भांगरभूंय | प्रतिनिधी
खंयच्याय वाठाराची उदरगत करतलो जाल्यार बऱ्योच गजाली लागतात. तातूंतली सगल्यांत म्हत्वाची गजाल म्हणल्यार येरादारी. गोंयचे उदरगतींत कदंब म्हामंडळाचो हात आसा, हें मानून घेवचेंच पडटलें. कारण ज्या मार्गांचेर मात्तूय फायदो ना, थंय कदंब बशी हालीं- हालीं मेरेन चलताल्यो. तशें हें म्हामंडळ लुकसाणेंत वचपाचीं बरींच कारणां आसात. कदंब म्हामंडळान हालींच एक येवजण तयार केल्ली. खाजगी बशी भाड्यान घेवपाची. मात, ती पंक्चर जाल्ल्यांतूच जमा आसा. फक्त अधिकृत घोशणा जावपाची उरल्या. हे येवजणे खातीर फक्त आठ अर्ज आयल्यात.
बालरथांची वाडटी मागणी तशेंच कांय मार्गांचेर बशी नाशिल्ल्यान कदंब म्हामंडळान खाजगी बशी भाड्यान घेवपाचें थारायिल्लें. किलोमिटरा फाटल्यान ते बसधनयांक पयशे दिवपाचे. बशीचे देखभालीची जापसलदारकीय तांकांच दिल्ली. पूण जादा बशी आशिल्ले बसधनी सोडल्यार हे येवजणेक कोणे तेंकोच दिवंक ना. दुसरे वटेन तांचे कडेन पोरण्यो बशी आसात. त्यो चलोवप म्हामंडळाक परवडपाचें ना अशें म्हामंडळाचें मत. खुद्द अध्यक्षान उणो प्रतिसाद मेळिल्ल्यान ही येवजण मुखार वचप कठीण आसा, अशें म्हणलां. कदंब म्हामंडळ फाटलीं कितलींशींच वर्सां लुकसाणेंत चलता. हे फाटभूंयेर आमच्यो बशी तांचे कडेन कश्यो दिवप, असो बसधनी संघटनेच्या अध्यक्षाचें मत. 2018 सावन मेळपी डिझेलाच्या अनुदानाचेय पयशे मेळूंक ना, असो ताचो दावो.
कोरोना उपरांत गोंयचे येरादारीचो आकृतीबंधूच (पॅटर्न) बदल्ला, हें मान्य करचेंच पडटलें. बशींनी प्रवास करप्यांक हें खबर आसा. कोरोना पयलीं खंयच्या मार्गाचेर कितल्यो कदंब, खाजगी बशी धांवताल्यो? सध्या कितल्यो धांवतात? हाच्यो जापो मेळ्ळ्यार खूब कितें कळटलें. येरादारी खात्यान कदंब कर्मचाऱ्यांचे मदतीन हो सर्व्हे करूं येता. बसस्टॅण्डाचेर सकाळीं, सांजच्या वेळार मनीस दवरून पळोवणी करूं येता. बऱ्योच खाजगी आनी कदंब बशी बंद जाल्यात. पणजेच्यान सांजवेळा 5 ते 8.30 मेरेन कितल्यो खाजगी बशी म्हापसा, अस्नोडा मार्गान वतात. चवकशी करची. खाजगी बसधनी म्हणटात, लुकसाण जाता म्हूण बशी बंद दवरल्यात. त्यो खरेंच बंद आसात काय आनीक खंय चलतात? वासपुस करची.
गोंयांत हालींसराक ट्रॅफिक जाम वाडल्यात. हाचे फाटल्यान कांय कारणा आसात. तातूंत खाजगी वाहनां वाडल्यांत हेंय एक कारण. बशी बंद आसात, म्हूण तीं वाडूंक नात मूं? आगशे आतऱ्या पयऱ्यान येरादारीची कोंयडी जाता. एक वराचे वाटेक दोन ते तीन वरां लागतात. कांयच उपाय नात हाचेर? पर्यायी जोड रस्ते, शाॅर्ट कट मार्ग नात? नासल्यार ते करप शक्य ना? चोडण- रायबंदर पूल जायत जाल्यार पणजी- म्हापशें- करासवाडा, थिवी, अस्नोडें मार्गा वयलो येरादारीचो ताण कमी जातलो. सरकारी कार्यालयांचो वेळ बदल्ल्यारुय समस्या कांय प्रमाणांत सुट्टली. दुसरी एक प्रस्न आसा. रस्ते खणपाचो. पणजेच न्हय, तर हेर शारां, गांवांनीय खणून दवरलां. म्हयन्याचे म्हयने हीं कामां चलतात. उदरगत जावपाक जाय ही गजाल खरी. पूण, लोकांनी कितलीं वर्सां हे त्रास सोंसपाचे? 1, 2 वर्सां, 4, 6, 10 वर्सां? खंयचेय विकासकाम 10 वर्सां वयर कित्याक तिगना? रस्तें हें सामकें जितें, फडफडीत म्हणटा तसलें उदाहरण. शारांनी, रस्त्या कुशीक फुलझाडां, पेव्हर्स…. बरी सजावट करतात. फुलां धोलपाक लागलीं काय रोंपां हुमटून नवीं लायतात. फुटिल्ले चार पेव्हर्स बदलपाचे सोडून सगळी फुटपाथूच उस्तून नवी बांदतात….!! लोक उलयनात, पूण हाचे फाटलें कारण तांकां बेसबरें खबर आसा.
राज्यांतली येरादारी सुरळीत करपाक आतां कदंब म्हामंडळ लायटीचेर चलपी एसी बशी घेवपाचें आसा. गोंयचे कांय थारावीक रस्ते सोडल्यार ह्यो बशी चलोवप म्हणल्यार सर्कशींत काम केल्ले सारकें. ताचे परस मिनीबशीच बऱ्यो. आतां 150 इलेक्ट्रीक बशी येवपाच्यो आसात. बरी गजाल. लोकांक फटाफट बशी मेळ्ळ्यो जाल्यार ते स्वताच्यो गाडयो वापरचे नात. फेरीबोट मार्गूय बशींनी जोडपाक जाय. बोटी चार आनी बस एक- देड वरान आसली काय लोक स्वताचे गाडयेनूच वतले. सौर उर्जेचेर चलपी फेरीबोटूय आयल्या. ती खंय आसा ती सोदून काडून वापरपाक जाय. आतां भाड्यान बशी घेवपाची येवजण उरली म्हूण निर्शेनासतना सध्या आसा त्योच बशी फायद्यांत कश्यो येतल्यो आनी लोक वेळार आॅफिसांत, घरा कशे पावतले हाची खबरदारी कदंब म्हामंडळान घेवची. खंयच्यो बशी बंद जाल्यात ताचो नियाळ प्रवाशां कडल्यान घेवन थंय कदंब मिनीबशी घालच्यो. नाजाल्यार 2030 उपरांत खाजगी आनी कदंब बशी वखदाक उरतल्यो. आतांच ताचीं चिन्नां दिसपाक लागल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
