भांगरभूंय | प्रतिनिधी
सरकारी अधिकारी सुस्त; म्हैसाळ धरणाक घात; एका पंच वांगड्याचोय आस्पाव
फोंडें: किर्लपाल पंचायतींतल्या म्हैसाळ सारक्या रान वाठारांत बेकायदो चिऱ्या खणींक ओतो आयला. पूण सरकारी अधिकारी मात सुस्त आशिल्ल्याचें दिसून येता. ह्या रान वाठारांत सुमार 10 जाणांनी मशिनाच्या आदारान व्हड प्रमाणांत चिरे काडपाक सुरवात केल्या. ताका लागून म्हैसाळ धरणाक लेगीत घात निर्माण जाला. म्हौसाळ धरणाचे सुरक्षे खातीर बेकायदो चिऱ्या खणी, तेच बरोबर वाठारांत स्फोट करतात ते खडी क्रशर लेगीत बंद करपाची मागणी लोकां कडल्यान जायत आसा.
पुराय रान वाठार आशिल्ल्या म्हैसाळ धरणा पसून कांय अंतराचेर फाटल्या कांय म्हयन्यां सावन बेकायदो चिऱ्या खणी सुरू केल्यात. दुसऱ्या मतदारसंघांतल्या एका पंच वांगड्यान लेगीत बेकायदो चिऱ्या खणीचो वेवसाय सुरू केला. ताका लागून सगल्या थळार सेटींग जाल्ल्याचो दुबाव थळावे लोक उक्तायतात.
बेकायदो चिऱ्या खणी सुरू करतना खूबशीं झाडां मारल्यांत. पूण अजून मेरेन सरकारी अधिकाऱ्यांक वाठारांत सुरू आशिल्ल्या चिऱ्या खणीचो वेवसाय दिसून येनाशिल्ल्यान गोंदळ निर्माण जाला.
म्हैसाळ धरणाच्या कांय अंतराचेर फाटल्या कितल्याशाच वर्सां सावन खडीची खण सुरू आसा. पावसा दिसांनी खणीच्या खणींतलो सगलो गाळ धरणांत वता. सरकारी अधिकाऱ्यांक ह्या प्रकाराची म्हायती आसून लेगीत कारवाय करिनात. खडीच्या खणीचेर स्फोट करीत आशिल्ल्यान धरणाक घात निर्माण जाल्ल्याची म्हायती थळाव्या लोकां कडल्यान मेळ्ळी.
पोरूं वर्सा पावस सुरू जावपाक कळाव जाल्ल्यान म्हैसाळ धरणाचें उदक सोंपिल्लें. ताका लागून प्रकल्पांतल्यान शिरोडें वाठारांतल्या लोकांक कांय दीस उदका पुरवण बंद केल्ली. तशेंच सुकिल्ल्या धरणांत व्हड प्रमाणांत खडीच्या खणींतल्यान व्हांवून आयिल्लो गाळ दिसून येतालो. पूण सरकारी अधिकाऱ्यांक बेकायदो कृत्य दिसून येनाशिल्ल्यान ताचो फटको लोकांक सोंसचो पडटा. फुडारांत म्हैसाळ धरण सुरक्षीत दवरपा खातीर बेकायदो चिऱ्या खणी आनी खडीच्यो खणी बंद करपाची मागणी लोकां कडल्यान जायत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
