भांगरभूंय | प्रतिनिधी
60 रुपया कर घेवपाची मागणी
पणजी: भाजी मार्केटांतल्या कंत्राटदारान सोपो कर अचकीत 50 रुपया वयल्यान 90 रुपया केल्ल्यान विक्रेते निरशेले. काल (मंगळारा) पालिकेंत येवन तांणी ही कारवाड रोखडीच उणी करून फक्त 60 रुपया कर घेवचो अशी मागणी नगराध्यक्ष आनी उपनगराध्यक्ष हांचे कडेन केली. हो विशय पालिका मंडळा मुखार मांडून उपाय काडटले अशें उपनगराध्यक्ष विराज फडके हांणी सांगलें. ह्या वेळार नगराध्यक्षा प्रिया मिशाळ हाजीर आशिल्ल्यो.
म्हापशें पालिकेन सोपो करांत सुमारा भायर वाड केल्ल्यान विक्रेते निरशेल्यात. हे विशीं तांणी नगराध्यक्ष आनी उपनगराध्यक्ष हांचे मुखार आपली कागाळ मांडली. हाचे पयलीं सोपो कर प्रती चौखण मिटर 20 रुपया प्रमाण आकारताले. हाका लागून विक्रेत्यांक चडांत चड 50 रुपया कर भरचो पडटालो. पूण आतां केल्ले दरवाडीक लागून तो 90 रुपया भरचो पडटलो. इतलो कर भरपाची विक्रेत्यांची तांक ना. कारण सद्या वेपार थंड आसा. गिरायक बाजारांत येनात. ताका लागून आनीक 10 रुपया वाडोवन हो कर 60 रुपया घेवचो अशी मागणी ह्या वेळार विक्रेत्यांनी केली.
मजगतीं, विक्रेत्यांचे मागणेचेर उपनगराध्यक्ष विराज फडके हांणी अजाप उक्तायलां. आमी सुमारा भायर कर वाडयिल्लो ना. नेमा प्रमाण प्रती चौखणमिटर 5 रुपया आनी कोयर कर 5 रुपया अशी वाड केल्या. तरी लेगीत विक्रेते खूश नासत जाल्यार तांणी तसो रितसर अर्ज करचो. तो अर्ज पालिका मंडळा मुखार दवरतले. थंय जें थारतलें ते प्रमाण कार्यवाही करतले अशें फडके हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
