भांगरभूंय | प्रतिनिधी
म्हापशें: बोडगेश्वर मैदानार आयोजीत एमआरएफ मोग्रीप सुपरक्रॉस चॅम्पियनशीप सर्तींत प्रात्यक्षीक कसरत करतना जाल्ल्या अपघातांत एका स्पर्धाकाक दुर्दैवी मरण आयलें. अल्ताबआलम हसन लाडजी (20, घोगळ मडगांव) अशें मयत तरणाट्याचें नांव आसा.
ही घडणूक आयतारा 13वेर सकाळीं 11.30 वरांच्या सुमाराक घडली. मयत अल्ताबआलम लाडजी हो स्पर्धक आपली जीए 03 क्यू 8578 ह्या क्रमांकाची हिरो इम्प्लस मोटारसायकल घेवन रेस ट्रॅकार दुचाकी जम्प करून कसरत करतालो. ह्या वेळार ताचे दुचाकी वयलें नियंत्रण गेलें आनी अपघात घडलो. मयत दुचाकी सयत ट्रॅकारूच कोसळ्ळो. फाटल्यान आयिल्ल्या दोन स्पर्धक दुचाकींनी ताका धपको दिलो.
हे सर्ती खातीर ह्या मैदानार कृत्रिमरितीन ट्रॅक तयार केल्ले आनी ह्या ट्रॅकाचेर ही रेस सर्त सकाळीं सुरू आशिली. फोंडकुलां बरोबरूच ट्रॅकाचेर स्पर्धक जम्प मारतना हो अपघात घडलो. अपघातांत मयत अल्ताबआलम लाडजी हाचे तकलेक तशेंच हड्ड्या कुशीक दुखापत जाली. ताका ताकतिकेन आयोजकांच्या अॅम्बुलन्सींतल्यान म्हापशेंच्या खाजगी हॉस्पिटलांत दाखल केलो. उपरांत ताका फुडल्या उपचारा खातीर गोमॅकाँत धाडून दिलो. थंय उपचार सुरू आसतना दनपारां ताका मरण आयलें.
ह्या अपघाताचो पंचनामो म्हापशेंचे पुलीस हवालदार उमेश नायक हांणी केलो. जाल्यार फुडलो तपास पुलीस उपनिरिक्षक रिचा भोंसले करतात.
ह्या अपघाता उपरांत सर्तीच्या आयोजनाचेर लोकांनी प्रस्न उपस्थीत केला. प्रशासकी यंत्रणांचो कसलोच परवानो घेनासतना शेत जमनीचें लुकसाण करून सर्ती खातीर रेसीचे ट्रॅक तयार करपाच्या प्रकाराक शेतकार संघटणेचे संजय बर्डे आनी हेर शेतकारांनी आक्षेप घेतिल्लो. ही घडणूक घडली तेन्ना नगराध्यक्ष शुभांगी वायंगणकार, उपनगराध्यक्ष चंद्रशेखर बेनकार, पालिका मुख्याधिकारी अमितेश शिरवयकार हांचे सयत नगरसेवक आनी आयोजक हाजीर आशिल्ले. इतले व्हड सर्तीचें बेकायदो रितीन आयोजन करपाची मेकळीक प्रशासकी यंत्रणांनी कशी दिली हे विशींय लोकां कडल्यान प्रस्न उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
