म्हापश्यां तरणाटो पडलो बांयंत
भांगरभूंय | प्रतिनिधी
उजो पालोवपी दळाच्या जवानांनी वाटायलो
म्हापशें: शेटयेवाडो, म्हापश्यां बांयंत तोल वचून पडिल्लो प्रभाकर शिंदे (29, रा. कान्सा, थिवी) हाका म्हापशें उजो पालोवपी दळाचे जवान स्वप्नेश कळंगूटकार आनी गिरीश गांवस हांणी सुखरूप भायर काडलो. शिंदे हाचेर हॉस्पिटलांत उपचार सुरू आसात.
ही घडणूक रातीं 9.45 वरांच्या सुमाराक घडली. जखमी तरणाटो वाट चुकून वयले बांयचे कुशीक पावलो आनी ताचो तोल वचून तो भितर पडलो. ही बांय सुमार 70 फूट खोल आशिल्ली. शिंदे हाणें बोवाळ करतकूच बांयच्या शेजरा आशिल्ल्या लोकांनी घडणुकेची म्हायती उजो पालोवपी दळाक दिली.
दळाच्या जवानांनी घडणूक थळार धांव घेतली. बांयंत पडिल्ल्यान शिंदे भियेल्लो. उजो पालोवपी दळाचे जवान सुरज शेटगांवकार. प्रवीण पिसुर्लेंकार, विश्वनाथ कोरगांवकार, चंद्रकांत नायक आनी साईल गांवस हांच्या आदारान स्वप्नेश कळंगूटकार आनी गिरीश गांवस हे दोरयेच्या आदारान बांयंत देंवले आनी शिंदेक सुखरूप भायर काडलो.
उपरांत ताका उपचारा खातीर म्हापशेंच्या जिल्हो हॉस्पिटलांत दाखल केलो. थंय ताचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
