म्हादय पदयात्रेक सरकाराचो धपको

भांगरभूंय | प्रतिनिधी

सत्तरी उपजिल्होधिकाऱ्यान न्हयकारली परवानगी; म्हालांत 144 कलम लागू

वाळपय: टुगेदर फॉर म्हादय ह्या म्हादय न्हंय वाटावपा विशीं रिव्होल्युशनरी गोवन्स (आरजी) पक्षान सुरू केल्ले पदयात्रेक सत्तरी म्हालाचे उपजिल्होधिकारी प्रवीण परब हांणी फाटीं घेतिल्ली परवानगी कायम दवरल्या. तेच प्रमाण सत्तरी म्हालांत अशे तरेचें आंदोलन करपाक पुरायपणान प्रतिबंध केल्यात आनी 144 कलमा खाला जमावबंदीचो आदेश जारी केला. फुडले सात दीस हो आदेश लागू जातलो. तेच प्रमाण अशे तरेची पदयात्रा काडपाक मनाय केल्या. हे विशींचो आदेश तांणी काल (बुधवारा) जारी केलो.

हाका लागून आरजी पक्षा वतीन टुगेदर फॉर म्हादय ह्या संदर्भांतली लोकजागृताय करपा खातीर काडिल्ली पदयात्र ती आतां रद्द करची पडटली. मजगतीं, ह्या आदेशा आड गोंय खंडपिठांत याचिका दाखल करपाची तयारी पक्षान सुरू केल्ल्याची म्हायती मेळ्ळ्या.

कर्नाटक सरकारा कडल्यान म्हादय न्हंयचे उदक घुंवडावपा विशीं यत्न सुरू केल्यात. हाका लागून गोंय सरकार हातूंत पुरायपणान अपेशी थारिल्ल्याचो ठपको दवरून आरजी पक्षान म्हादय न्हंये विशीं लोकजागृताय करून गोंयकारांक जागृत करपा खातीर पदयात्रा सुरू केल्ली.

सोमारा ही पदयात्रा सत्तरी म्हालांतल्या ठाणें पंचायत वाठारांतल्यान सुरू जाल्ली. पूण ही पदयात्र काडपा खातीर रितसर परवानगी घेवंक नाशिल्ल्यान आनी हे पदयात्रेक म्हाऊस पंचायतीन हरकत घेतिल्ल्यान ती ठाण्यां पुलिसांनी आडायिल्ली. हे पदयात्रेक ठाणें वाठारांतल्यानूच अपशकून निर्माण जाल्लो. तेच सुवातेर उपजिल्होधिकारी प्रवीण परब हांचे कडेन विस्तारान चर्चा केले उपरांत हे विशींची परवानगी घेवपाचे निर्देश उपजिल्होधिकाऱ्यान दिल्ले. उपजिल्होधिकाऱ्या कडेन परवानगी खातीर अर्ज दिले उपरांत उपजिल्होधिकाऱ्यान ह्या संदर्भांतली परवानगी दिल्ली.

मजगतीं, सत्तरी उपजिल्होधिकाऱ्यान परवानगी दिले उपरांत ठाणें वाठारांतल्यान हे पदयात्रेक सुरवात जाल्ली. पूण उपजिल्होधिकाऱ्यान दिल्ली परवानगी एका वरान तांणीच फाटीं घेतली. हाका लागून सुरू आशिल्ली पदयात्रा पुलिसांनी कोपाड्ड्यां आडायली. त्या वेळार थंय तणावाची परिस्थिती निर्माण जाल्ली.

उपजिल्होधिकारी प्रवीण परब हांणी दिल्ली परवानगी फाटीं घेतिल्ल्यान हे विशींची सुनावणी मंगळारा कचेरेंत जाली. ह्या वेळार संघटणेच्या वकिला वतीन नेटाचो युक्तिवाद केलो. हे विशींचो निकाल उपजिल्होधिकारी प्रवीण परब हांणी काल (बुधवारा) सकाळीं जाहीर करतना टुगेदर फॉर म्हादय हे संघटणेक फुडले 60 दीस अशे तरेची पदयात्रा काडपाक पुरायपणान प्रतिबंध घाल्यात. अशे तरेची पदयात्र काडूंक येना. हाका लागून शांतताय भंग जावपाची शक्यताय आसा. पदयात्रा काडपाचो यत्न जायत जाल्यार कायदेशीर कारवाय करपाची शिटकावणी आदेशांत दिल्या.

तेच प्रमाण सत्तरी म्हालांत 144 कलम लागू करून जमावबंदी लागू केल्या. जमावबंदीचो प्रस्न उप्रासल्यार कायदेशीर कारवाय करपाची शिटकावणी उपजिल्होधिकाऱ्यान दिल्या.

जमावबंदीचो आदेश फक्त पदयात्रे पुरतोच मर्यादीत

144 कलम लागू करून जमावबंदी करपाक प्रतिबंध केल्ल्यान सत्तरी म्हालांत गोंदळाची स्थिती निर्माण जाल्ली. हे विशीं तांचे कडेन संपर्क सादलो तेन्ना तांणी सांगलें, जमावबंदीचो आदेश फक्त पक्षाचे पदयात्रे पुरतोच मयादीत उरतलो. भौशीक कार्यावळी वा हेर स्वरुपाच्यो कार्यावळींक हो आदेश लागू जावचो ना. हे खातीर लोकांनी कसलोच गैरसमज करून घेवचो न्हय अशें प्रवीण परब हांणी स्पश्ट केलें.

निकाला आड वतले खंडपिठांत: आरजी

उपजिल्होधिकारी प्रवीण परब हांणी पदयात्रा काडपाक न्हयकार दिवपाचो आदेश जारी केल्ल्यान मुंबय उच्च न्यायालयाच्या गोंय खंडपिठांत याचिका दाखल करतले आनी कायदेशीर न्याय मागतले अशें आरजी पक्षान स्पश्ट केलां.