मोबायल चोरपी आंध्र प्रदेशांतले टोळयेक म्हापश्यां अटक

भांगरभूंय | प्रतिनिधी

सात मोबायल फोन जप्त; दोगांक कोलव्यां घेतले ताब्यांत

म्हापशें: हांगासरल्या बस स्टॅण्डार एका प्रवाशाचो मोबायल फोन चोरून धांव मारपी आंध्र प्रदेशांतले चोरांचे टोळयेक म्हापशें पुलिसांनी अटक केल्या. दुबावितां कडल्यान 70 हजारांचे सात अ‍ॅन्ड्रॉयड मोबायल फोन आनी चोरये खातीर वापरिल्ली महिंद्रा झूव ही मोटार जप्त केल्या.

दुबावीत अनाकाला किशोर (27), सथुपदी शिवाजी (25) आनी परदेश सट्टी पट्टी (19) रा. कुर्नूल- आंध्र प्रदेश हांकां अटक केल्या.

ही मोबायल चोरयेची घडणूक सोमारा 28 वेर रातच्या 8.30 वरांच्या सुमाराक घडिल्ली. कागाळदार अब्दुल रकीब मीया (मरड-म्हापशें, मूळ अस्तंत बंगाल) हो म्हापशेंच्या कदंब बस स्टॅण्डार करासवाड्यार वचपा खातीर राविल्लो. कदंब येतकूच सीट आडावपा खातीर तो आपली बॅग बशीच्या सिटार जनेलांतल्यान उडयतालो.

ह्या वेळार दुबावीत अनाकाला किशोर हाणें ताच्या हातांतलो मोबायल फोन झोमून धांव मारली. कागाळदारान बोवाळ करून फाटलाग केलो. तेच बरोबर स्टॅण्डार आशिल्ल्या लोकांनीय ताचो फाटलाग करून ताका धरलो. ताचे पयलीं दुबावीत चोरिल्लो मोबायल आपल्या हेर वांगड्यांचे सुवादीन करपाक येसस्वी थारिल्लो.

घडणुकेची म्हायती मेळटकूच म्हापशें पुलिसांनी दुबाविताक ताब्यांत घेतलो. चवकशे वेळार दुबाविताच्या वांगड्यांनी कोलव्यां धांव मारिल्ल्याची म्हायती पुलिसांक लागली. ते प्रमाण म्हापशें पुलिसांनी कोलवें पुलिसांचे मजतीन दुबाविताचे वांगडी सथुपडी शिवाजी आनी परदेशी सट्टी पट्टी हांकां कोलवें सावन ताब्यांत घेवन मंगळारा अटक केली.

दुबावितां कडेन कागाळदाराच्या मोबायला सयत अजून स मोबायल फोन सांपडल्यांत. हे मोबायल आनी एपी 02 बीजी 1978 ह्या क्रमांकाची महिंद्रा झूव मोटार लेगीत पुलिसांनी जप्त केल्या.

पुलीस निरिक्षक सोमनाथ माजीक हांच्या मार्गदर्शना खाला उपनिरिक्षक आशीश पोरोब, गौरव नायक, हवालदार सुशांत चोपडेंकार, कॉन्सटेबल प्रकाश पोळेकार, अभिषेक कांसार, आनंद राठोड, अक्षय पाटील तशेंच कोलवेंचे उपनिरिक्षक सुभाष गांवकार, हवालदार रोहन नायक, कॉन्स्टेबल सुशांत पागी ह्या पंगडान ही कारवाय केली.

ही दुबावीत टोळी सोमाराच गोंयांत दाखल जाल्ली. दुबावीत कोलवें वाठारांतल्या एका हॉटेलांत देंविल्ले. सांजवेळा ते म्हापशें बस स्टॅण्डार प्रवाशांचे मोबायल फोन फारावपाच्या इराद्यान आयिल्ले आनी ही चोरी करतना सांपडले. दुबावितां कडेन सांपडिल्ले हेर मोबायला विशीं पुलीस चवकशी करतात.