मोगा खातीर ती पावली पाकिस्तानांतल्यान भारतांत
भांगरभूंय | प्रतिनिधी
नवी दिल्ली : ‘पंछी, नदियां, पवन के झोके कोई सरहद इन्हे ना रोके!’ मोगाक कसलीच मर्यादा नासता. हें याद करून दिवपाचें कारण म्हळ्यार पाकिस्तानांत रावपी एक बायल मोगाक खातीर आपलो देश पाकिस्तानाची शीम हुपून भारतांत आयली.
ही गजाल ग्रेटर नोएडा हांगा घडली. मोगान पुराय पिशी जावन ही बायल आपल्या चारूय भुरग्यांक घेवन आयली. आपल्या मोग्याक मेळपा खातीर फाटलो फुडलो कसलोच विचार करिनासतना. ते बायलेक आनी तिच्या भुरग्यांक सध्या पुलिसांनी ताब्यांत घेतल्यांत.
मेळिल्ले म्हायती प्रमाण,
PUBG ही गेम खेळटना तिची एका भारतीय मनशा कडेन वळख जाली. आनी तिचें रुपांतर मोगांत जालें.
ही बायल नेपाळचे वाटेन भारतांत आयली. ग्रेटर नोएडा हांगा ती रावताली. गेम खेळटना ह्या दोगांयची वळख जाल्ली. भारतांत आयले उपरांत ह्या मनशान तिका आपल्या घरांत दवरिल्ली. तिची पिराय 28- 29 वर्सां आसा. ती चारूय भुरग्यां सयत ग्रेटर नोएडांत एक घर भाड्यान घेवन रावता हें पुलिसांक कळटकच ते तपासपाक आयले. हें कळटांच त्या दोगांयनी थंयच्या पळ काडपाचो यत्न केलो. निमाणें पुलिसांनी तांकां धरलींच. फुडलो तपास चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
