भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव बंदर प्राधिकरणाच्या बर्थ नंबर 10चेर एमव्ही एक्सप्लोर आफ्रिका हे बोटींत 24 वरांच 29 हजार 150 मेट्रीक टन लोखणाचे पॅलेट्स भरपाचो नवो विक्रम केलो. ही विक्रमी कार्गो हातळणी बर्थ 10चो मुखेल स्टिव्हेडोर डेल्टा इन्फ्रालोजिस्टिक वर्ल्डवायड ग्रूप (डीआयडल्बूजीएल) ह्या आस्थापनान केली अशी म्हायती एमपीएचो उपाध्यक्ष गुरुप्रसाद राय हाणे दिली.
मुरगांव बंदरात हाचे पयलीं डीआयडब्ल्यूजीएलान बोटींत 24 वरांत 28008 हजार मेट्रीक टन कार्गो भरपाचो विक्रम केलो. नवे हाताळेण तांणीच तो मोडलो.
विक्रम मोडपाची ही गजाल आमचे खातीर अभिमानाची आसा. पॅलेट्स व्हो पर्यावरणाचे लुकसाण करनाशिल्लो कार्गो आसा. मांडवी रिव्हर पॅलेटल प्रा. ली (एमआपपीपीएल) कंपनीचो व्हो कार्गो आसा, कर्नाटकांतल्या मीन हाडून गोंयांत ताचें पॅलेट्सांत रुपांतर करपाचें काम ही कंपनी करता आनी मुरगांव बंदरांतल्यान ताची निर्गत करता अशें राय हाणे सांगलें. पॅलेट्स बरे, नितळ आनी धुल्ल विरयत आसात अशें एमपीएचे येरादारी वेवस्थापक हिमांशु शेखर हाणे सांगलें. मुरगांव बंदर भारतातलें सामके वेस्थ अशें बंदर आसा. सुवात कमी आशिल्ल्यान कार्गो हाताळणेक कळाव जाता. ते खातीर हे फावट प्री स्टेकिंग तंत्रगिन्यानाचो वापर आमी केलो. बोट 4 तें 5 दिसांत भरपाची आमची येवजण आशिल्ली पूण तें काम 3.5 दिसांत जाले. व्हो विक्रम कार्गो हाताळणे कडेन संबद आशिल्ल्या सगल्यांच्या सहकार्याक लागून जाला अशें शेखऱ हाणे सांगलें.
बोटींत वट्ट 51,000 मेट्रीक टन पॅलेट्स कार्गो भरला. 25 डिसेंबराक कार्गो भरपाक सुरवात केल्ली आनी 27 डिसेंबराक तें सोपलें अशी म्हायती डीआयडब्ल्यूजीएलाचो उपाध्यक्ष राघोबा कोटकारान दिली. एमव्ही एक्लप्लोर आफ्रिका ही बोट ओल्डनड्रोफ कंपनीची आसा. कार्गो घेवन ती केनिया वतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
