भांगरभूंय | प्रतिनिधी
मुरगांव पालिकेचे समितीची आयज बसका
वास्को, प्रतिनिधी: साळगांव कोयर प्रक्रिया प्रकल्पांत येवपी मुरगांव पालिकेचो कोयर घेवचे नात, अशें कळ्ळां. हाका लागून येवपी वायट परिस्थिती संबंदी चर्चा करपा खातीर शेनवारा ९ सप्टेंबराक मुरगाव पालिका मंडळाचे धन कोयरा वेवस्थापन समितीचे अध्यक्ष आनी नगरसेवक नारायण बोरकार हांणी बसका आपयल्या. हे बसकेंत मुरगांव पालिकेच्या सडा हांगची कोयर प्रक्रिया प्रकल्पा संबंदी चर्चा करतले.
मुरगांव पालिकेन २००० वर्सा सड्यार आपलो कोयर प्रक्रीया प्रकल्प सुरु केल्लो. थंय कोयराचेर प्रक्रिया करून सेंद्रीय सारें तयार करपाचे आशिल्ले. हें सारें शेतकार्यांक विकपाचें आशिल्लें. कांय दीस हो प्रकल्प वेवस्थीत सुरू आशिल्लो. थंय तयार जाल्लें सेंद्रीय सारें विकताले. पूण हो प्रकल्प मोडलो तो आजूनय तसोच आसा.
मुरगांव पालिकेचो स्वताचो प्रकल्प आसून लेगीत दिसभर एकठांय केल्लो कोयर साळगांवच्या कोयरा प्रक्रिया प्रकल्पांत धाडटा. ताका लागून मुरगांव पालिकेचो कोयर प्रक्रिया प्रकल्प हो नांवा पुरतो आशिल्ल्याची प्रक्रिया लोक उक्तायतात.
पालिका वाठारांत सकाळीं धा टन सुको कोयर आनी वीस टन वोलो कोयर एकठांय जाता. पालिका वाठारांतलो विंगड विंगड वाठारांतल्या कोयर संकलन केंद्रांनी एकठांय जावपी कोयर प्रक्रिया प्रकल्पांत हाडिल्लो. तांतलो बारा ते पंदरा टन कोयर साळगांवां कोयर प्रक्रिया प्रकल्पांत व्हरता. उरिल्ल्या कोयरांतल्यान कांय प्रमाणांत सेंद्रीय सारें तयार करतात. सडा हांगचो कोयर प्रक्रिया प्रकल्पांत एकठांय जावपी कोयर हो विशय सदांच वादाचो थारला. आतां साळगांवच्या कोयर प्रक्रिया प्रकल्पांत कोयर घेवचे नात अशी म्हायती मेळिल्ल्यान हो विशय सोडोवपा खातीर ही बसका आयोजीत केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
