मुख्याधिकारी, नगराध्यक्षांचेर एनजीओ करतात फटीचे आरोप

भांगरभूंय | प्रतिनिधी

मुरगांवचे मुख्याधिकारी जयंत तारी हांणी नांवां केलीं जाहीर

वास्को: मुरगांव पालिका मंडळाचे खाशेले बसकेंत गोवा शिपयार्डाच्या नव्या इमारतीक दिल्लो हरकत ना दाखलो, हेडग्या गोरवांचो बंदोबस्त, हातगाडे, स्टॉल्स आदींचो सोपो कर, सडो मार्केट सुरू करपा विशीं चर्चा जावन कांय म्हत्वाचे निर्णय घेतले. दोन एनजीओ कडल्यान मुख्याधिकारी, नगराध्यक्ष हांचेर फटीचे आरोप करून वैयक्तीक लक्ष्य करीत आशिल्ले खातीर मुख्याधिकारी जयंत तारी हांणी निरशेणी उक्तावन संबंदितांचीं नांवां जाहीर सांगली. संबंदितां आड भारतीय दंड संहिते प्रमाण कारवाय करपा खातीर पालिका मंडळान योग्य तो थाराव घेवचो. जेणे करून संबंदितांक न्यायालयांत व्हरप सोंपे जातलें. कसलोच पुरावो नासतना संबंदीत जाय तशे आरोप करून आमचे नांव पेड्डेर करतात. हे संबंदी योग्य वेळार योग्य उपाय येवजण जाली ना जाल्यार असले प्रकार हाचे मुखारूय सुरूच उरपाची भिरांत जयंत तारी हांणी उक्तायली.

कसलोच पुरावो नासतना सरकारी अधिकाऱ्याचेर आरोप करप हो दखलपात्र गुन्यांव आसा. हे संबंदी मुरगांव पालिका मंडळान योग्य थाराव घेतलो जाल्यार सरकारा कडेन फुडलो पत्रवेव्हार करतले. उपरांत सरकारी वकिला वतीन संबंदितांचेर योग्य कागाळ न्यायालयांत सादर करतले अशें तारी हांणी सांगलें. ह्या वेळार संबंदीत एनजीओच्या ज्या पदाधिकाऱ्यांनी आरोप करून मुख्याधिकारी, नगराध्यक्ष हांची बदनामी केल्या तांचे आड कायदेशीर कारवाय करपा खातीर पालिका मंडळान मान्यताय दिली.

मुरगांव पालिका मंडळाची खाशेली बसका रवींद्र भवनाच्या परिशद सभाघरांत काल (सोमारा) जाली. हेडग्या गोरवां संबंदी चर्चा जाली. ह्या गोरवांक धरून ती गोशाळेंत धाडपा संबंदी संबंदीत गोशाळे कडेन समजिकायेची कबलात केल्या. गोरवां धरपा खातीर लागपी खर्च दितले. अतिरिक्त कामगार घेवपा संबंदी लेगीत चर्चा जाली. मुरगांव पालिकेक 15 वित्त आयोगा कडल्यान येवपी निधी मेळपाक वेळ लागपाचो आशिल्ल्यान पालिकेन स्वताच्या निधीचो वापर करून कांय कामगार घेवचे असो थाराव घेतलो.

हातगाडे, स्टॉल हांचे कडल्यान सोपो कर वाडोवपा संबंदी चर्चा जाली. फाटलीं कितलींशींच वर्सां प्रतिमिटर फक्त तीन रुपया सोपो कर घेताले. तो 15 रुपया करपा संबंदी चर्चा केली. ते खातीर जाचो स्टॉल तीन मिटराचो आसतलो ताका म्हयन्याक सुमार देड हजार सोपो दिवचो पडटलो.

पूण पालिका मार्केटांत आशिल्ल्या ल्हान दुकानदारां कडल्यान म्हयन्या खातीर फक्त 230 रुपया घेतात. ताका लागून सोपो करांत असमानताय येतली अशें नगरसेवक फ्रेड्रीक हेन्रिक्स, दीपक नायक हांणी सांगलें. हे संबंदी योग्य अभ्यास संबंदीत अधिकाऱ्यांनी करून फुडले बसकेंत सदर अहवाल दवरचो असो निर्णय घेतलो.

जल्मदाखल्याचे शुल्क वाडोवपाचो निर्णय घेतलो. आतां लोकांक जल्मदाखल्या खातीर 50 रुपया मेजचे पडटले. बायणा हांगासरल्या ओल्ड पॉवराचे सुवातेंत वेपारी संकूल बांदपाचे आशिल्ल्यान थंयच्या गाडेधारकांची सोय हेर कडेन करतले.

गोवा शिपयार्डा संबंदी फाटले बसकेंत कांय निर्णय घेतिल्ले. पूण ते संबंदीची कसलीच नोंद इत्तिवृत्तांत नाशिल्ल्यान दीपक नायक आनी हेरांनी तिडक उक्तायली. ते बसकेंत आमी गोवा शिपयार्डाचो हरकत ना दाखलो फाटी घेवपाचो थाराव एकमतान घेतिल्लो. ताका लागून मुख्याधिकारी, पालिका अभियंते बी हांणी आपली मतां मांडिल्लीं. तांची नोंदूच जावंक नाशिल्ल्याचें दिसून आयलें. त्या थारावाची इत्तिवृत्तांत नोंद करची अशी सुचोवणी केली. आमी घेतिल्ल्या थारावाक किंमत ना, जाल्यार बसका घेवन उपेग कितें असो प्रस्न दीपक नायक हांणी उप्रासायलो. सदर हरकत ना दाखलो फाटी घेवपा संबंदी कायदो सल्लागारा कडल्यान योग्य तो सल्लो घेतले उपरांत ते संबंदी निर्णय घेवपाचे आसात.