भांगरभूंय | प्रतिनिधी
वृत्त निवेदक म्हूण 30 वर्सां दिली सेवा
पणजी: 30 वर्सांच्या प्रदीर्घ सेवे उपरांत पणजी आकाशवाणी केंद्राचे वृत्त निवेदक मुकेश थळी शुक्रारा सेवेंतल्यान निवृत्त जाले. आकाशवाणी पणजी केंद्रान तांचे खातीर खासा निवृत्ती सुवाळ्याचें आयोजन केल्लें. मुकेश थळी हे भोवआयामी व्यक्तीमत्व, नामनेचे साहित्यीक, कोशकार, नेमान दिसाळ्यांनी बरोवपी, एक बरे लेखक आयज निवृत्त जातात, अशा उतरांनी आकाशवाणी पणजी केंद्राचे मुखेली सुनील भाटिया हांणी तांची तोखणाय केली.
आकाशवाणी वृत्त विभागांत फाटलीं 30 वर्सां सेवा दिता आसतना त्या विभागान मुकेश थळी हांच्या म्हालवजार आपली खाशेली वळख तयार केली अशें नामनेचे रंगकर्मी अजीत केरकार हांणी सांगलें.
कोंकणी भाशेचो उपाट मोग आशिल्ले व्यक्तीमत्व अशा उतरांनी पणजी केंद्राचे आदले वृत्त विभाग मुखेली गोपाळ चिपलकट्टी हांणी तांकां परबीं भेटयली.
1993 सावन मुकेश थळी हांचे बरोबर नैमित्तीक वृत्त निवेदक म्हूण सेवा दिवपी सुभाष जाण, आकाशवाणी पणजी केंद्राच्यो निवेदिका चारुशिला कामत, उषा नायक आनी हेरांनी शुभेत्सा दिवपी उलोवपां केलीं.
सागर अग्नी, रघुनाथ सांकोड्डेंकार, राजश्री कामत, कार्यावळ अधिकारी प्रेमानंद कदम, आकाशवाणी वृत्त विभागाचे मुखेली तुषार जाधव आनी हेरांचींय उलोवपां जालीं.
निवृत्ती उपरांत आवयभाशेची सेवा अदीक नेटान करपाचो हावेस आपणें बाळगिला अशें मुकेश थळी हांणी आपल्या निवृत्ती निमतानच्या भोवमानाक जाप दितना सांगलें.
कार्यावळीचें सुत्रसंचालन सुहास च्यारी हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
