भांगरभूंय | प्रतिनिधी
मुख्यमंत्री: मोपा विमानतळ पुलीस स्टेशनाचे नवे इमारतीचें उक्तावण
पेडणें: पेडणें म्हालाचे उदरगती खातीर दोनूय आमदारांक भिवपाची गरज ना. पेडणें म्हाल दिसान दीस उदरगती बाबतींत सक्षम जायत आसा. मोपा विमानतळाक लागून ताचे उदरगतीक नेट आयला. विमानतळाचेर निर्माण जावपी रोजगाराची संद दरेकल्या तरणाट्यांनी घेवची. भुमिपुत्रांनी ते खातीर फुडाकार घेवचो. दरेका नागरिकाक बरी सेवा मेळची, हे नदरेन गृह खातें सशक्त करपाचें काम सुरू आसा. सुरक्षीततायेचे नदरेन रोखडेंच मांद्रें मतदारसंघांत पुलीस स्टेशन स्थापन जातलें अशें मुख्यमंत्री डॉ. प्रमोद सावंत हांणी सांगलें. मोपा मनोहर विमानतळाचेर पुलीस स्टेशनाचे नवे इमारतीचें उक्तावण केले उपरांत ते उलयताले.
मोपा इंटरनॅशनल एअरपोर्ट फाटल्या स म्हयन्यां सावन सुरू जाला. पूण मोपा पुलीस स्टेशन एका पाख्या खाला आशिल्ल्यान कर्मचार्यांक धुल्लान काम करचें पडटालें. आतां नवी इमारत उबारून तिचें उक्तावण मुख्यमंत्र्या हस्तुकीं जालें.
ह्या वेळार आमदार प्रवीण आर्लेकार, मोपा सरपंच सुबोध महाले, वारखंड सरपंच गौरी जोसलकार, पेडणें भाजप मंडळ तुलसीदास गांवस, पेडणें नगराध्यक्ष सिद्धेश पेडणेंकार, पुलीस महानिरीक्षक जसपाल हांचे वांगडा आदली नगराध्यक्ष उषा नागवेंकार, नगरसेविका आश्विनी पालयेंकार, नगरसेविका तृप्ती सांवळ देसाय, नगरसेविका विशाखा गडेकार, तोरसेचे आदले सरपंच सूर्यकांत तोरस्कार, आदले जिल्हो पंचायत वांगडी रमेश सावळ देसाय, सरपंच सुजाता ठाकूर, पंच स्वाती मालपेंकार आनी सरपंच, उपसरपंच, नागरीक हाजीर आशिल्ले.
भायले लोक येवं शकतात
इमारतींत पुलिसांक सगळे तरेच्यो सुविधा उपलब्ध केल्यात. आदीं पेडणें म्हालांत बस आनी रेल्वे सेवा उपलब्ध आशिल्ली. आता हवाई सेवाय उपलब्ध जाल्या. फुडाराक ह्या विमानतळा वेल्यान आंतरराष्ट्रीय विमान सेवा सुरू जातली. विमानतळार सुरक्षिततायेचे नदरेन सुरक्षा रक्षक तैनात करपा वांगडा गृह खातें कार्यक्षम करता. ताका लागून योग्य त्यो सुविधा उपलब्ध करून दिल्यात, अशें मुख्यमंत्र्यान फुडें म्हणलें.
विमानतळाक लागून उदरगत जातलीच. वांगडा लोक वस्तीय वाडटली. येवपी काळांत मोपा हजारांनी रोजगार निर्माण जातले. तांचो लाव घेवचो. ना जाल्यार भायले लोक येवन ह्यो नोकर्यो आनी वेवसाय सांबाळटले, असो भंय मुख्यमंत्र्यान उक्तायलो.
दरेका सरपंच, जिल्हा पंचायत वांगडी, कार्यकर्ते, नागरिकांनी ज्यो उदरगतीच्यो, रोजगाराच्यो संदी आसतल्यो ताची जागृताय करून त्यो मेळोवन दिवपाचो यत्न करचो असोय उलो मुख्यमंत्री सावंत हांणी मारलो.
आमदार आर्लेकार हांणी ह्या पुलीस स्टेशनाचेर येवपाक आडखळी येवच्यो न्हय देखून एक आवट पोस्ट विमानतळाच्या पलतडीं उपलब्ध करून दिवपाची मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
