भांगरभूंय | प्रतिनिधी
जातीय हिंसाचाराचो पुलिसांक फटको
भांगरभूंय । खबरां संस्था
इंफाळ : मणिपूरांत फाटल्या तीन म्हयन्यां सावन फकत सामान्य लोकच न्हय तर पुलीस कर्मचारीय हिंसाचाराच्या चपक्यांत आयल्यात. सूत्रांनी दिल्ले म्हायतीचेर जर विस्वास दवरपाचो जालो जाल्यार 45 हजारां परस चड कर्मचारी आशिल्ल्या पुलिसांचे खंय राज्यांत दोन गट पडल्यात. लोकांचे सुरक्षे खातीर मैतई समाजाचे पुलीस इंफाळ देंगणाचे वटेन आनी कुकी समाजाचे पुलीस तांचो समाज रावता त्या दोंगुल्ल्यांचे दिशेन बंदोबस्ताक वतात. हिंसाचाराच्या वेळार पुलिसांनी परिस्थिती सारकी हाताळूंक नाशिल्ल्याचोय आरोप केला.
नवो मुखेली
फाटल्या म्हयन्यांत मणिपूर पुलीस मुखेली म्हणून नेमणूक जाल्ल्या राजीव सिंगाचेर राज्यांत शांतताय परतून हाडप आनी पुलिसां मदीं आत्मविस्वास निर्माण करून तांकां एकवटीत दवरपाची व्हडली जापसालदारकी आसा. राजीव सिंग हे त्रिपुरा कॅडराचे 1993 बॅचाचे आयपीएस अधिकारी. मणिपूर पुलीस मुखेली जावचे पयलीं ते सीआरपीएफांत प्रतिनियुक्तीचेर आशिल्ले.
अधिकाऱ्यांच्या म्हणण्या प्रमाण, राजीव सिंग पुलीस मुखेली जाले तेन्ना सुमार 1200 कर्मचारी ड्युटीचेर गैरहाजीर आशिल्ल्याचें तांकां दिसलें. अशे परिस्थितींत ताणें पयलीं ह्या पुलीसांची वळख पटोवन तांकां जाय थंय ड्युटी करपाची परवानगी दिली. आतां मेरेन 1150 पुलीस कर्मचारी परतून ड्युटेचेर आयल्यात अशें अधिकाऱ्यांनी सांगलां.
पुलीस करतात मजत?
पुलीस स्टेशनां आनी सुरक्षा शिबिरांनी दवरिल्लीं शस्त्रां आनी दारुगुळो लुटपाक पुलीस कर्मचाऱ्यांनी जमावांक मजत केल्ल्याच्यो गंभीर केशी नोंद जाल्यात अशें पुलीस अधिकाऱ्यांनी सांगलें. ह्या प्रकरणांक तोंड दिवपा खातीर राजीव सिंग हांणी सगल्या सुरक्षा दळाचेर बारीक नदर दवरपाचो आनी अशी घडणूक घडची न्हय, हे खातीर खबरदारी घेवपाचो संदेश दिला.
अधिकाऱ्यांच्या म्हणण्या प्रमाण, कांय दिसां आदीं थौबल जिल्ह्यांतल्या खंगाबोक वाठारांतल्या तिसऱ्या भारतीय राखीव बटालियनाच्या कॅम्पांतल्यान शेंकड्यांनी लोकांनी शस्त्रां आनी दारुगुळो लुटपाचो यत्न केलो.
शस्त्रां लुटपाचो यत्न अपेशी थारिल्ल्यान तांणी आयआरबी शिबिरांत तैनात केल्ल्या जवानाच्या घरांक उजो लायलो अशें अधिकाऱ्यांनी सांगलें. अजापाची गजाल म्हळ्यार ज्या पुलीस हवालदारांचीं घरां जमावान लासल्यांत, ते तांच्याच समाजांतले. मणीपुरांत दिसान दीस हिंसाचार, तणाव जातीय रुप घेत आशिल्ल्यान ताका वेळारूच आळाबंद हाडप गरजेचें, अशें समाजवावुरप्यांचें मत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
