भांगरभूंय | प्रतिनिधी
मडगांव, प्रतिनिधी : मडगांवां स्मार्ट सिटी करतले. ताका लागून नियोजना खातीर नेमिल्ले एजन्सीन आराखडो तयार केला. ह्या आराखड्यांत सुचवण्यो आनी हरकतीं प्रमाण बदल जातले. १५ ते १७ जानेवारीच्या काळांत नगरसेवकांक प्रेझेंटेशन दाखयतले, अशी म्हायती नगराध्यक्ष दामोदर शिरोडकार हांणी दिली.
मडगाव पालिकेची विशेश बसका शुक्रारा सकाळीं पालिकेच्या सभाघरांत जाली. हे बसके उपरांत नगराध्यक्ष शिरोडकार हांणी नगरसेवकांक स्मार्ट सिटी विशींच्या आराखड्याची म्हायती दिली. तांणी मडगाव शहराचा मास्टर प्लान तयार करपा खातीर नेमिल्ले एजन्सीचें काम पुराय जालां. शाराक स्मार्ट करपा खातीर पळोवणी करून आराखडो तयार करपाचें काम हातांत घेतिल्लें. मास्टर प्लान तयार करपी एजन्सीन शाराचो आराखडो पालिकेक दिला. हो आराखडो आजूनय फायनल जावंक ना. नगरसेवकांक पालिका सभाघरांत १५ ते १७ जानेवारीक ह्या मास्टर प्लॅन आराखड्याचें पॉवर पॉयंट प्रेझेंटेशन दाखयतले. स्क्रिनीचेर सगळ्या नगरसेवकांक आराखडो दाखयल्या उपरांत तांच्यो सुचवण्यो आनी हरकती आयकून घेतले. सुचवण्यो आनी हरकती उपरांत हो मास्टर प्लान फायनल करतले. सगळ्या नगरसेवकांनी ह्या प्रेझेंटेशनाक हाजीर रावचें अशें नगराध्यक्ष शिरोडकार हांणी सांगलें.
मजगतीं, पालिका बसके उपरांत नगराध्यक्षांनी मडगांव शाराचो मास्टर प्लानाचो आराखडा नगरसेवकां मुखार दवरतले. तांच्या प्रभागांतल्या कामांची आनी उदरगतीची म्हायती तांकां दितले. तशेंच आराखडो निमाणो नाशिल्ल्यान नगरसेवकांक तो बदलपाच्यो सुचवण्योय करपाक मेळच्यो ना, अशें नगरसेवक घनश्याम शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
