भांगरभूंय | प्रतिनिधी
हल्ल्या फाटल्यान हुथी बंडखोर आशिल्ल्याचें अमेरिकेचें म्हणणें
न्यूयाॅर्क, खबरां संस्था ः रेड सींत भारतीय ध्वज आशिल्ल्या तारवाचेर ड्रोन हल्लो केल्ल्याची घडणूक कांय वरां आदीं उजवाडाक आयल्या. ह्या हल्ल्या संबंदी अमेरिकेन व्हडलो दावो केला. तांणी सांगलें, यॅमॅनांतल्या हुती बंडखोरांनी हे बोटीचेर केला. गॅबॉनचे मालकीच्या एमव्ही साईबाबा हे बोटी वयल्या कोणाक मरण येवंक ना. पूण ह्या तारवान ह्या वाठारांत गस्त घालपी अमेरिकेच्या झुजारी बोटीक संकश्टाचो संदेश धाडलो. अमेरिकेच्या केंद्रीय कमांडान ही म्हायती मायक्रोब्लॉगिंग प्लॅटफॉर्म एक्साचेर वांटल्या. बोटीर 25 भारतीय कामगार आशिल्ले आनी ते सुरक्षीत आसात, अशें भारतीय नौदलान सांगलें.
अरबी समुद्रांत इराणान भारतीय तारवाचेर हल्लो केले उपरांत रेड सींत आनीक एक भारतीय तारवाचेर हल्लो जाला. देखून भारतीय नौदल सावध जालां.
रेड सीचे दक्षिणेक हीं दोनूय तारवां वतना थंय गस्त घालपी अमेरिकेच्या नौदलाच्या तारवाक तांणी हल्ल्याची म्हायती दिली. ते प्रमाण दक्षिणे कडेन वचपी तारवाचेर नॉर्वेचो ध्वज आशिल्लो, तें ब्लेमेनेनाचें तारूं आसलें. यॅमॅनांतल्या हुती बंडखोरांनी उडयल्लो ड्रोन तांच्या तारवा वयल्यान गेलो. ह्या ड्रोनान एमव्ही साईबाबा ह्या तारवाचेर हल्लो केलो.
एमव्ही साईबाबा हें जहाज गॅबनाचे मालकेचें आसून ताचेर भारतीय ध्वजूय आसा अशें अमेरिकेच्या लश्करान सांगलां. ह्या तारवांतल्यान कच्च्या तेलाची येरादारी जाताली. ड्रोन हल्ल्याक लागून तारवाचेर कोणाक मरण आयिल्ल्याची म्हायती मेळूंक ना.
गुजरात दर्यादेगे लागीं इराणाचो हल्लो
मजगतीं, घडणुकेच्या कांय वरां आदीं अरबी दर्यांतल्या गुजरात दर्यादेगेर वेपारी तारवाचेर ड्रोन हल्लो जाल्लो. ह्या हल्ल्याक लागून तारवाच्या कांय वाठारांनी स्फोट जावन उजो पातळ्ळो. ह्या हल्ल्यांत जरी मनशाचो जीव गेलो ना तरी उज्याक लागून तारवाचें व्हड लुकसाण जालें. ह्या तारवांत 20 भारतीय जवान आशिल्ल्यान भारतीय नौदलान तांचे सुरक्षे खातीर आपली बोट धाडल्या. अमेरिकेच्या संरक्षण दळान हो ड्रोन हल्लो इराणान केला असो दावो केला.
हल्लो जाल्ल्या एमव्ही केम प्लूटोचेर लायबेरियाचो ध्वज आशिल्लो आनी तें इस्रायल कडेन संबंदीत आशिल्लो. ही बोट 9 डिसेंबराक कच्चें तेल घेवन साउदी अरेबियांतल्यान कर्नाटकांतल्या मंगळूर बंदराक गेल्लें. 25 डिसेंबर मेरेन तें मंगळूर पावपाचें आशिल्लें. पूण गुजरातांतल्या वेरावळाचे नैऋत्येक 200 किलोमीटर आनी पोरबंदर दर्यादेगेर 217 दर्या मैलांचेर हो हवाई हल्लो जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
