भांगरभूंय | प्रतिनिधी
म्हापशें: भाजपा फुडारी सोनाली फोगट खून प्रकरणां कडेन संबंदीत ड्रग्ज प्रकरणाची चवकशी टाळपा खातीर आपूण कोरोना पॉझिटिव्ह आशिल्ल्याची बनावट आरटीपीसीआर सर्टिफिकेट सादर करून फटवणूक केल्ल्या प्रकरणांत कार्लीस क्लबाचे जोड धनी दुबावीत एडवीन नूनीस हाका हणजूण पुलिसांनी अटक केली.
पुलिसांनी हो गुन्यांव फाटल्या 24 सप्टेंबर दिसा नोंद केल्लो. बिरेस्तार 3 नोव्हेंबर दिसा सकाळीं ह्या प्रकरणांत दुबावीत एडवीन हणजूण पुलिसांक शरण आयिल्लो. उपरांत पुलिसांनी भादंसंच्या 468 आनी 471 कलमा खाला ताका अटक केली.
फोगट मरण प्रकरणा कडेन निगडीत ड्रग्ज प्रकरणांत हणजूण पुलिसांनी दुबावीत एडवीन नूनीस हाका 27 ऑगस्ट दिसा अटक केल्ली. फाटल्या 7 सप्टेंबर दिसा दुबावीत नूनीस हाची म्हापशेंच्या अतिरिक्त जिल्हो आनी सत्र न्यायालयान सशर्त जामिनार सुटका केल्ली.
ह्या प्रकरणाचे चवकशे खातीर पुलीस सेगीत आपयताले. पूण पुलिसांचे चवकशेक दुबावीत प्रतिसाद दिनाशिल्लो. ताका लागून हणजूण पुलिसांनी एडवीनाचो जामीन रद्द करचो अशी मागणी न्यायालयांत अर्जा वरवीं केल्ली.
पुलिसांनी जामीन रद्दचो अर्ज सादर केल्ल्याचें समजतकूज दुबावितान 23 सप्टेंबर दिसा पुलीस स्टेशनार येवन आपूण कोवीड पॉझिटिव्ह आशिल्ल्याचें प्रमाणपत्र सादर केलें, आनी आपल्याक पुलीस स्टेशनार हजेरी लावपा पसून 15 दिसांची सुटी दिवची अशी मागणी केल्ली.
पूण पुलिसांनी दुबाविताच्या ह्या प्रमाणपत्राची खातरजमा डायग्नोस्टिक्स सेंटरांत केली. तेन्ना दुबाविताक ह्या सेंटरांतल्यान निगेटिव्ह सर्टिफिकेट दिल्ल्याचें स्पश्ट जाल्लें. ते प्रमाण हो फटवणुकीचो गुन्यांव दाखल केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
