भांगरभूंय | प्रतिनिधी
बोट महाराष्ट्रांतल्या आकीब मुजावर नांवाच्या धनयाची
मुरगांव: थळाव्या नुस्तेमारांनी काल रातीं बोगमाळो हॉलांत दर्यादेगेर एलईडी दिवे आनी जनरेटर आशिल्ली नुस्तेमार बोट धरली. थळाव्यांनी दिल्ले म्हायती प्रमाण ही बोट महाराष्ट्रांतल्या आकीब मुजावर नांवाच्या धनयाची आसा.
मेळिल्ले म्हायती प्रमाण बोगमाळो हॉलांत थळाव्या नुस्तेमारांनी सोमारा रातीं 11.30 वरांचेर एक बोट एलईडी दिवे लायिल्ली खोल दर्यांत दिसली. तांणी रोखडीच आपली बोट घेवन थंय धांव घेतली आनी ते बोटीर वचून तांचे कडेन चवकशी केली तेन्ना ह्या बोटी वयल्या कर्मचाऱ्यांक जाप दिवंक आयली ना.
थळाव्या नुस्तेमारांनी तांची बोट बोगमाळो हॉलांत दर्यादेगेर हाडून ते बोटीचेर आशिल्ल्या कर्मचाऱ्यांक आपल्या ताब्यांत दवरले. ह्या वेळार थळाव्या नुस्तेमारांनी नुस्तेमार खात्या कडेन संपर्क सादपाचो यत्न केलो तेन्ना संपर्क जावंक शकलो ना.
मजगतीं, काल (मंगळारा) सकाळीं परतून खात्या कडेन संपर्क सादलो तेन्ना नुस्तेमारी खात्याचे अधिकारी हॉलांत येवन पंचनामो केलो. तशेंच तटरक्षक पुलिसांकूय आपयले.
मजगतीं, बोटीची झडटी घेतली तेन्ना बोटींत एलईडी दिवे व्हड प्रमाणांत सांपडले. एक मोटो जनरेटर, तशेंच सकयल उदकांतूय हे बोटीक एलईडी दिवे लायिल्ले दिसून आयले. अदीक मेळिल्ले म्हायती प्रमाण ही बोट फक्त एलईडी लायट मारपा खातीर उपेगांत हाडटात आनी नुस्तें मारपा खातीर दुसरी बोट येता अशी म्हायती मळ्ळ्या. सदर अलसभा नांवाची बोट महाराष्ट्रांतल्या आकीब मुजावर नांवाच्या धनयाची आशिल्ल्याची म्हायती मेळ्ळ्या. हे बोटीचेर आशिल्ल्या पांच कर्मचाऱ्यांक तटरक्षक पुलिसांनी ताब्यांत घेतल्यात आनी रातीं उसरां मेरेन तांची चवकशी सुरू आशिल्ली.
गोंयचो रापोणकारांचो एकवोटचे सरचिटणीस ओलन्सियो सिमॉयश हांणी हे विशीं निरशेणी उक्तायतना, एलईडी दिवे घालपाक आशिल्ली बंदी ही नांवां पुरतीच आसा आनी उच्च न्यायालयाच्या आदेशाची अंमलबजावणी जायना. सरकारान तशेंच नुस्तेमार खात्यान हाचेर ताकतिकेन उपाय काडचो. तशेंच धरिल्ले बोटीचेर आनी बोट धनयाचेर खर कारवाय करची अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
