भांगरभूंय | प्रतिनिधी
गाडये सयत हेर कांय वस्तूंचें लुकसाण
वास्को : मंगळारा रातीं बोगमाळो चर्ची फाटल्यान आशिल्ल्या दोंगराचीं पालसणां कोसळ्ळीं. ताका लागून चर्चीच्या फादराचे गाडयेचें आनी हेर कांय वस्तूंचें लुकसाण जाले. थंय आनीक पालसणां कोसळपाची शक्यताय आशिल्ल्यान सुरक्षीताय म्हणून राखणे वण्टी बांदतले अशें चिकोळणा- बोगमाळोचे सरपंच संकल्प महाले हांणी सांगलें.
बोगमाळो चर्चीच्या फाटल्यान फादर रावता. गाडयो दवरपा खातीर तांणी थंय शेड उबारल्या. कांय प्राचीन वस्तूय तातूंत दवरल्यात. चर्चीच्या फाटल्यान आशिल्लो दोंगर कोसळून व्हड फातर आनी माती सकयल देंवली. हाका लागून गाडी आनी हेर वस्तूंचे लुकसाण जाला. सरपंच महाले आनी हेर पंचांनी सकाळीं थंय वचून पळवणी केली. तलाठ्यान त्या जाग्याची पळोवणी करून अहवाल तयार केला. थळाव्या लोकांनी आनी उजो पालोवपी दळान कांय वस्तू सुरक्षीत सुवातेर व्हेल्यो. जेसीबीचो वापर करून फातर आनी माती कुशीक काडल्या. हो दोंगर आनी थंय तीन- चार व्हडले फातर कोसळपाची शक्यताय आसा. ते फादर फर्नांडीस हांच्या घराचे वयले वटेन आसात. देखून हाचेर बेगोबेग उपाय करपाची गरज आसा, अशीं प्रतिक्रिया थळाव्यांनी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
