भांगरभूंय | प्रतिनिधी
पुलिसांनी 1.40 लाखांचो दंड केलो वसूल; पालकांक दिली ताकीद
म्हापशें: सान पिरायेच्या चालकां आड म्हापशें विभागीय पुलिसांनी मोहीम राबोवन 14 दुचाकी जप्त केल्यो. ह्या सान पिरायेच्या चालकांच्या बापाय कडल्यान 1.40 लाखांचो दंड वसूल केलो आनी तांकां ताकीद दिली.
गोंयांत सान पिरायेच्या चालकां कडल्यान अपघाताचें सत्र वाडलां. हालींच्या काळांत अशा चालकां कडल्यान जिवघेणे अपघातूय घडल्यात. हे फाटभुंयेर मुख्यमंत्री डॉ. प्रमोद सावंत हांणी सान पिरायचो वाहन चालक दिसून आयल्यार चालकाच्या पालकाचेर कारवाय करपाचे निर्देश पुलिसांक दिल्ले.
ते प्रमाण म्हापशें उपविभागीय पुलीस अधिकारी कचेरेच्या कार्यक्षेत्रांतल्या म्हापशें, कोलवाळ आनी हणजूण ह्या पुलीस स्टेशनांनी विशेश मोहीम राबयली. हे मोहिमे खाला म्हापशें पुलिसांनी पांच सान पिरायेच्या चालकांक धरले आनी तांचे कडल्यान जीए 03 एई 4167, जीए 03 एस 2376, एमएच 12 केव्ही 9149, जीए 03 एल 1380 व जीए 03 एआर 6322 ह्यो पांच दुचाकी जप्त केल्यो.
कोलवाळ पुलिसांनी आठ दुचाकीं चालकांक धरले आनी तांचे कडल्यान जीए 03 एक्यू 9762, जीए 03 एस 8044, जीए 03 एजी 2831, जीए 03 एएन 8650, जीए 03 एक्यू 1289, जीए 08 एएन 7373, जीए 04 डी 8014, जीए 04 डी 8014 आनी जीए 04 डी 9164 जप्त केल्यो.
जाल्यार हणजूण पुलिसांनी जीए 03 एस 2937 ही दुचाकी जप्त करून सान पिरायेच्या चालकाक ताब्यांत घेतलो.
ह्या सगल्या सान पिरायेच्या दुचाकी चालकांचे पालक आनी दुचाकींच्या धनयांक पुलीस स्टेशनांत आपोवन हाडले. सान पिरायेच्या भुरग्यांक मोटर वाहन चलोवपाक दिवप, अनधिकृत व्यक्तीक वाहन चलोवपाक परवानगी दिवप, तशेंच मोटर वाहन कायद्याचें उल्लंघन करपाच्या आरोपा खाला मोटर वाहन कायदो कलम 4 आनी 5 तशेंच काया नेम कलम 181 आनी 3 आनी 4 ह्या कलमा खाला संबंदितांचेर दंडात्मक कारवाय केली. दरेकी 10 हजार रुपया दंड वसूल केलो तशेंच सान पिरायेच्या चालकांक परतून वाहन चलोवपाक दिल्यार अटक करपाची ताकीद दिवन तांकां सोडले.
पुलीस अधिक्षक निधीन वाल्सन, उपअधिक्षक जिवबा दळवी, निरिक्षक परेश नायक, सोमनाथ माजीक आनी प्रशल नायक देसाई हांच्या मार्गदर्शना खाला ही कारवाय केली.
कांदोळे पर्यटकांक भाड्यान दिल्लीं खाजगी वाहनां जप्त
कळंगूट पुलिसांनी कांदोळे पर्यटकांक भाड्यान दिल्लीं दोन खाजगी वाहनां जप्त केल्यांत. हातूंत जीप आनी दुचाकीचो आस्पाव आसून पुलिसांनी संबंदीत वाहन धनयां आड गुन्यांव दाखल केला. हालींच मुख्यमंत्र्यांनी खाजगी वाहनां पर्यटकांक भाड्यान दिवपी वाहन धनयांचेर खर कारवाय करपाचे निर्देश पुलिसांक दिल्ले हे फाटभुंयेर पुलिसांनी ही मोहीम राबयली. ते प्रमाण जीए 07 एल 9874 क्रमांकाची थार जीप आनी जीए 03 एएन 0785 क्रमांकाची फसिनो स्कुटर पर्यटकां सयत धरली. दोनूय वाहनांच्या दुबावीत धनयांचेर खाजगी वाहनां भाड्यान दिल्ल्याच्या आरोपा वयल्यान गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
