भांगरभूंय | प्रतिनिधी
विद्यार्थ्यांक जेटी-बोगदाच्या सरकारी विद्यालयांत हालोवपाची तयारी
वास्को: सरकारी मुळावी शाळा आनी माद्यमीक विद्यालय (वास्को मेन) हाचे फाटोफाट बायणांतल्या सरकारी विद्यालयाची इमारत घातक थारिल्ल्यान विद्यार्थ्यांची वेवस्था जेटी-बोगदाच्या सरकारी विद्यालयाच्या इमारतींत करपाचे यत्न सुरू जाल्यात.
मजगतीं, घातक थारिल्ल्या सरकारी मुळावी-माध्यमीक विद्यालय (वास्को-मेन) च्या माद्यमीक विद्यार्थ्यांची वेवस्था मांगोरहील सरकारी विद्यालयांत केल्या. जाल्यार मुळावे वर्ग मुरगांव म्हाल सहाय्यक भाग शिक्षणाधिकारी कचेरेंत घेतात. त्या विद्यार्थ्यांक मांगोरहील सावन हाड-व्हर करपा खातीर बशीची वेवस्था जाले उपरांत त्या विद्यार्थ्यांकूय मांगोरहील विद्यालयांत हालयतले अशें समजता.
हांगासरल्या सरकारी मुळावी-माद्यमीक विद्यालयाच्या (वास्को मेन) मुखेल दाराच्या पाख्याचो कांय भाग कोसळिल्ल्यान तशेंच वर्गातले वण्टींक विजेचो धक्को बसूंक लागिल्ल्यान हें विद्यालय चर्चेंत आयिल्लें. त्या विद्यालया खातीर नवी इमारत बांदपाचें वा दुरुस्तीचें काम हातांत घेवपाचे आसात. ते खातीर ह्या विद्यालयाचे वर्ग कांय म्हयने मांगोरहील सरकारी विद्यालयाचे इमारतींत भरतले.
मुरगांव म्हालांत सुमार 15 सरकारी-माद्यमीक विद्यालयां आसात. बायणांत सरकारी उच्च माद्यमीक विद्यालय आसा. हातूंतल्या मांगोरहील सरकारी विद्यालयांत आदले आमदार कार्लुस आल्मेदा हांच्या यत्नाक लागून नवे रुप दिल्लें. ताका लागून ही इमारत सगल्यांचे लक्ष ओडून घेता.
दाबोळी, पोटसिरो बोगमाळो, चिखली, सातांत्र सांकवाळ, केळशी-कुठ्ठाळी हांगासरल्या सरकारी विद्यालयांच्या इमारतींची दुरुस्ती केल्या. पूण कांय सरकारी विद्यालयांचे दुरुस्ती कडेन जाय तशें लक्ष दिवंक नाशिल्ल्यान सद्या पडटा त्या उटंगाराच्या पावसांत समस्या निर्माण जाल्या. तातूंत बायणांतल्या सरकारी विद्यालयाच्या इमारतीचो आस्पाव आसा.
बायणाच्या सरकारी विद्यालयाच्या घातक इमारतींत विद्यार्थी आनी शिक्षक वर्ग भिरांतीच्या सांवटा खाला वावुरतात. ताका लागून वरिश्ठ शिक्षणाधिकाऱ्यान दखल घेतल्या.
झुआरीनगरांतल्या सरकारी मुळावी शाळा आनी माद्यमीक विद्यालयांच्या इमारतींच्या पाख्यांकूय गळटी लागल्या. ह्या विद्यालयांच्या पाख्याच्या लांकडी साहित्याक वाळटी लागिल्ल्यान पाखें कमकुवत जाल्ल्याचें समजता. ताका लागून थंयच्या इमारतींची दुरुस्ती जावपाची गरज आसा. जर हे गळटी कडेन योग्य वेळार लक्ष दिवन दुरुस्ती केली ना जाल्यार पुराय इमारत फुडारांत घातक थारपाची भिरांत उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
