भांगरभूंय | प्रतिनिधी
फोंडें: कुळें पुलिसांनी काल (सोमारा) दनपारां बागलकोट सावन चोरयेक गेल्ली रिक्षा मोलें चेक नाक्यार धरली. चोरून रिक्षा घेवन आयिल्लो अनंत बुका (30, म्हैसूर) हाका कुळें पुलिसांनी ताब्यांत घेवन रातीं उसरां बागलकोट पुलिसांचे सुवादीन केलो. निरिक्षक संजीव दळवी हांच्या मार्गदर्शना खाला उपनिरिक्षक अजय धुरी आनी हेर पुलिसांनी ही कारवाय केली.
मेळिल्ले म्हायती प्रमाण बागलकोट हांगा 29 जानेवारी दिसा रिक्षा (केए 17 डी 8907) चोरयेक गेल्ल्याची कागाळ रिक्षा धनयान थळाव्या पुलीस स्टेशनार दिल्ली. सोमारा दनपारां अनमोड घांटांतल्यान गोंयचे दिशेन येवपी हे रिक्षेन एमएच 02 एफआर 7996 क्रमांकाचे मोटारीक धपको दिवन धांव मारली. ह्या वेळार खूबशा वाहन चालकांनी रिक्षा आडावपाचो यत्न केलो. पूण रिक्षा चालकान सरळ मोलें चेक नाक्यार वचपाचो मार्ग स्विकारलो.
चेक नाक्या पसून सुमार देड ते दोन किलो मिटर अंतराचेर तैनात आशिल्ल्या पुलिसांनी रिक्षेक आडावपाचो यत्न केलो. थंयच्या पुलिसांक चुकोवन रिक्षा चालकान मुखार वचपाचो यत्न केलो. पुलिसांनी रोखडेंच चेक नाक्यार आशिल्ल्या पुलिसांक म्हायती दिवन गेट घालपाची विनंती केली. ताका लागून रिक्षा गेटी मुखार आयले उपरांत पुलिसांनी चालकाक ताब्यांत घेतलो.
हे संबंदी कुळें पुलिसांनी बागलकोट पुलिसांक म्हायती दितकूच सांजवेळा थंयच्या पुलिसांनी दुबावीत रिक्षा चालक आनी रिक्षा ताब्यांत घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
