फोंड्यां साफा मशिदी मुखा वयलो रस्तो उक्तो करचो

भांगरभूंय | प्रतिनिधी

शापूर, चिरपुटें लोकांची मागणी; नाजाल्यार लोकसभा वेंचणुकेचेर घालतले बहिश्कार

फोंडें: बांदोडें पंचायत वाठारांतल्या शापूर आनी चिरपुटें हांगासरल्या लोकांक यो-वच करपा खातीर साफा मशिदी मुखा वयलो रस्तो उक्तो करून दिवपाचें आस्वासन अजून पुराय केल्लें ना. थळाव्यांनी 4 वर्सां पयलीं घातक जंक्शनार सिग्नल बसोवपाचो वा वाठारांत अंडरपास उबारपाची मागणी केल्ली. फुडल्या कांय दिसांनी सरकारान थळाव्या लोकांच्या प्रस्नाचेर उपाय काडलो ना जाल्यार येता ते लोकसभा वेंचणुकेचेर बहिश्कार घालपाची शिटकावणी आयतारा सकाळीं एकठांय आयिल्ल्या ग्रामस्थांनी दिली.

राष्ट्रीय म्हामार्गाचें काम सुरू करचें पयलीं शापूर आनी चिरपुटें गांवांतल्या लोकां खातीर खास अंडरपास उबारपाचें आस्वासन थळाव्या लोकांक दिल्लें. पूण प्रत्यक्षांत काम सुरू केले उपरांत थंय थळाव्या खातीर रस्तो सोडिल्लो ना. ताका लागून वाठारांतल्या लोकांक फर्मागुडी जंक्शना वयल्यान यो-वच करचें पडटा. वा राष्ट्रीय म्हामार्गार यू टर्न घेवपाचो वेळ ग्रामस्थांचेर तशेंच खाजगी बस चालकांचेर आयल्या.

आयतारा सकाळीं बांदोडें पंचायतीचे आदले सरपंच राजेश नायक, पंच वांगडी सोनिया नायक, रेश्मा मुल्ला, ग्राम विकास समितीचे निमंत्रक अ‍ॅड. सुरेल तिळवे, खाजगी बस संघटणेचे अध्यक्ष सिद्धेश नायक, ज्येश्ठ नागरीक महाबळेश्वर सावंत आनी सुमार 100 परस चड ग्रामस्थ हाजीर आशिल्ले.

अदीक म्हायती दितना आदले सरपंच राजेश नायक हांणी 4 वर्सां पयलीं ग्रामस्थांनी सिग्नल बसोवपाची वा वाठारांत अंडरपास उबारपाची मागणी करपा खातीर रस्त्यार देंविल्ले. त्या वेळार दखल घेवपाचें आस्वासन मेळिल्लें. पूण अजून मेरेन थळाव्यांचे मागणी कडेन सरकारान गंभीरतायेन लक्ष दिलें ना. ताका लागून सरकाराक जागे करपा खातीर आयतारा व्हड संख्येन लोक एकठांय जाल्ले. बांदकाम मंत्री निलेश काब्राल हांणी हे सुवातेर येवन स्वता पळोवणी करून लोकांच्यो समस्या समजून घेवपाची गरज आसा. वाठारांत अंडरपास वा सिग्नल बसोवपाची सामकी गरज आसून फुडल्या कांय दिसांत सरकारान ठोस निर्णय घेतलो ना जाल्यार येता ते लोकसभा वेंचणुकेचेर वाठारांतले सुमार 2000 परस चड मतदार बहिश्कार घालतले अशें सांगलें.

अ‍ॅड. सुरेल तिळवेन सांगलें, राष्ट्रीय म्हामार्गार ग्रामस्थांनी रास्ता रोको केल्यार ग्रामस्थां आड गुन्यांव नोंद करतात. पूण ग्रामस्थांक यो-वच करपा खातीर आशिल्लो रस्तो बंद करून थंय राष्ट्रीय म्हामार्ग उबारतात तेन्ना मात कोणाचेर गुन्यांव नोंद करिनात. फोंडें म्हालांतले चार आमदार सरकारांत मंत्रीपदार आसात. तांचे कडल्यान लेगीत प्रस्नाचेर उपाय काडपाचो यत्न जाल्लो ना. सरकारान ग्रामस्थांचेर अन्याय केल्लो आसून निदान सिग्नल वा अंडरपास उबारून थाकाय दिवपाची गरज आसा. नाजाल्यार ग्रामस्थांक आपले मागणे खातीर राष्ट्रीय म्हामार्ग बंद करपाची वेळ येतली अशें सांगलें.

फोंडें खाजगी बस धनी संघटणेचे अध्यक्ष सिद्धेश नायक हांणी प्रवासी बस धनयांक लेगीत फर्मागुडी जंक्शना वयल्यान बस स्टॅण्डार वचपा खातीर चड खर्च येता. ताका लागून साफा मशिदी मुखा वयल्या राष्ट्रीय म्हामार्गार अंडरपास वा सिग्नल बसोवपाची सामकी गरज आसा. संघटणा ग्रामस्थांचे मागणेक पुरायपणान तेंको दीत आशिल्ल्याचें सांगलें.

चिंबला आनी मंगेशी हांगा थळाव्या लोकांक यो-वच करपा खातीर राष्ट्रीय म्हामार्गार रस्तो उक्तो केला. पूण शापूर आनी चिरपुटे गांवांतल्या लोकांक यो-वच करपा खातीर रस्तो अजून उक्तो केल्लो ना. ताका लागून सरकार एके तरेन थळाव्या लोकांचेर अन्याय करीत आशिल्ल्याचो आरोप आदले सरपंच राजेश नायक हांणी केलो.