भांगरभूंय | प्रतिनिधी
दुबाविताक घेतलो ताब्यांत; फातोड्डें पुलिसांची कारवाय
मडगांव: रातच्या वेळार पुलिसांची गस्त नासतली असो अदमास लावन गांजाची ‘डिलिव्हरी’ करपा खातीर भायर सरिल्ल्या तरणाट्याक फातोड्डें पुलिसांनी धरलो. ताचे कडल्यान तीन लाख रुपया मोलाचो तीन कील गांजा जप्त केलो.
मंगळारा फांतोडेर कदंब बस स्टॅण्डा कुशीक दुबावीत रामकिशन मुनीब चौहान (23, रा. दुबारी, उत्तर प्रदेश) हाका फातोड्डें पुलिसांनी अटक केली. सोमारा रातीं गस्त घालीत आसतना मडगांव बस स्टॅण्डार दुबावीत रितीन भोंवपी एक मनीस दिसून आयलो. त्या वेळार फातोड्डें पुलिसांनी त्या दुबाविताक ताब्यांत घेवन चवकशी केली तेन्ना, ताच्या वागण्या वयल्यान आनी उलोवण्या वयल्यान पुलिसांचो दुबाव आनीक खर जालो. दुबावीत रामकिशन मुनीब चौहान हाची झडटी घेतकूच दुबाविता कडेन गांजो आशिल्लीं तीन बंडलां सांपडलीं.
पुलिसांनी ह्या घुंवळे वखदांचे वजन करतकूच ते 3.183 कील आशिल्ल्याचें दिसून आयलें. ह्या गांजाचें मोल बाजारभावा प्रमाण सुमार 3 लाख इतलें जाता. दुबाविताची चवकशी केले उपरांत मंगळारा फांतोडेर चार वरांचेर दुबावीत रामकिशन हाका फातोड्डें पुलिसांनी अटक केली. ह्या प्रकरणांत फातोड्डेंचे पुलीस निरिक्षक गिरेंद्र नायक हांच्या मार्गदर्शना खाला पुलीस उपनिरिक्षक परेश रामनाथकार ह्या प्रकरणाचो फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
