भांगरभूंय | प्रतिनिधी
नोव्हेंबर 2021ची येणावळ 518 कोटी
नोव्हेंबर 2022ची येणावळ 447 कोटी
पणजी : गोंयची नोव्हेंबरांतली येणावळ फाटल्या वर्साच्या नोव्हेंबराचे तुळेंत 14 टक्क्यांनी उणीं आसा. नोव्हेंबर 2021 वर्सा जिएसटींतल्यान 518 कोटी रुपया एकठांय जाल्ले. अंदूंच्या नोव्हेंबरात जिएसटींतल्यान 447 कोटी रुपया जमा जाल्यात. फाटल्या वर्साचे तुळेंत हें प्रमाण 14 टक्के उणें आसा.
ऑक्टोबराचे तुळेंत नोव्हेंबरांत जिएसटींतल्यान चड येणावळ मेळ्ळ्या. ऑक्टोबर 2022त 420 कोटी रुपया जमा जाल्ले. नोव्हेंबरांत 447 कोटी रुपया जमा जाल्यात. ऑक्टोबरा परस नोव्हेंबरांत 27 कोटी रुपया चड मेळ्ळ्यात.
देश पांवड्या वेलो विचार करीत जाल्यार फाटल्या वर्साच्या नोव्हेंबरा परस अंदूंच्या नोव्हेंबराची जिएसटी येणावळ 11 टक्के चड आसा. देशांत नोव्हेंबर 2021 वर्सा 1,31,526 कोटी रुपया आसली. अंदूंच्या नोव्हेंबरांतली येणावळ 1,45, 867 कोटी रुपया आसा. हातूंत 25,681 कोटी केंद्रीय जिएसटी आसा जाल्यार 32,651 कोटी राज्याचो जिएसटी आसा.
नोव्हेंबर 2021चे तुळेंत हिमाचल प्रदेश, पंजाब, चंदीगड, राजस्थान, गुजरात, लक्ष्यदीप, केरळ, अंदमान आनी निकोबार ह्या राज्यांची अंदूंची येणावळ उणी आसा. हाका लागून फक्त गोंयचीच येणावळ उणी जाल्या अशें म्हणूंक येवचें ना. लक्षदीपाची येणावळ 79 टक्क्यांनी उणी जाल्या. हेर राज्यां परस महाराष्ट्राची जिएसटी येणावळ सगल्यांत चड आसा. महाराष्ट्राची नोव्हेंबरांतली येणावळ 21 हजार 611 कोटी आसा. फाटल्या वर्साच्या नोव्हेंबरांत महाराष्ट्राची जिएसटी येणावळ 18 हजार 656 कोटी आशिल्ली. अंदूं महाराष्ट्राची जिएसटी येणावळ 16 टक्क्यांनी वाडल्या. महाराष्ट्रा फाटोफाट कर्नाटकाची येणावळ लेगीत वाडल्या.
महाराष्ट्र, कर्नाटक, उत्तर प्रदेश, मध्य प्रदेश हीं व्हड राज्यां आसात. हाका लागून तांची जिएसटी येणावळ लेगीत चड आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
