भांगरभूंय | प्रतिनिधी
फोंडें: फर्मागुडयेर गोपाळ गणपती देवळाच्या प्राकारांत स. गिरीजाताई केळेकार स्मृती 34 व्या संगीत महोत्सवाचें कला आनी संस्कृती मंत्री गोविंद गावडे हांचे हस्तुकीं दिवली पेटोवन उक्तावण केलें. हो संगीत महोत्सव फोंडें पत्रकार संघ आनी गिरीजाताई केळेकार संगीत संमेलन समितीन कला आनी संस्कृती खातें हांच्या पालवान आयोजीत केला.
ह्या वेळार माचयेर पत्रकार अवीत बगळी, आयोजन समितीचे अध्यक्ष संजय घाटे, संमेलन समितीचे अध्यक्ष जयंत मिरींगकार, पत्रकार नरेंद्र तारी आनी येवकार अध्यक्ष रघुनाथ फडके हाजीर आशिल्ले.
ह्या वेळार उलयतना कला आनी संस्कृती मंत्री गोविंद गावडे हांणी संमेलनाचो व्याप वाडिल्लो आसून कलाकारांनी येसाचे तेंगशेर चडटना गर्व धरचो न्हय. कलाकाराक लागून संस्कृतीचो सांबाळ जाता. कला आनी संस्कृती खात्या वतीन सगले तरेचें सहकार्य दीत आशिल्ल्याचें तांणी सांगलें.
लोककलेचो संगम हीच गोंयच्या संस्कृतायेची वळख आसा. कलाकारांनी स्वताची कला नवे पिळगे कडेन सुपूर्द करपाचो यत्न करूंक जाय. तशेंच कलाकारांक प्रोत्साहीत करपा खातीर सरकाराचें सहकार्य चड गरजेचें आशिल्ल्याचें अवीत बगळी हांणी सांगलें.
ह्या वेळार राजेंद्र देसाय, व्यंकटेश परवार आनी विठ्ठल खांडोळकार ह्या कलाकारांचो मंत्री गावडे हांचे हस्तुकीं भोवमान केलो. कार्यावळीचें सुत्रसंचालन सुभाष जाण हांणी केलें. रघुनाथ फडके हांणी येवकार दिलो जाल्यार नरेंद्र तारी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
