भांगरभूंय | प्रतिनिधी
अधिसुचोवणी जारी; कलम 17 आनी उपकलम 2 खाला नेम तयार
पणजी : प्रादेशीक आराखड्यांत चुको आसत जाल्यार त्यो दुरुस्त करपा विशींची मार्गदर्शक तत्वां जारी जाल्यांत. मार्गदर्शक तत्वांं विशींची अधिसुचोवणी जारी जाल्या. गोंंय नगर नियोजन कायद्याच्या कलम 17 आनी उपकलम 2 खाला सरकारान दुरुस्ती खातीरचे नेम तयार केल्यात. ह्या नेमा खाला आतां मार्गदर्शक तत्वांं जारी जाल्यांत.
– कांय बांंदकामां आसात तरी तांंचो प्रादेशीक आराखड्यांत उल्लेख ना. रस्ते शक्य ना थंय रस्ते करपाची तजवीज, सीआरझॅड रेशेचो चुकीचो उल्लेख आसलो जाल्यार दुरुस्ती करपाची मेकळीक आसतली.
– प्रादेशीक आराखडो 2001/ ओडीपी नव्या प्रादेशीक आराखड्या कडेन सुसंंगत ना.
– जमीन संंपादीत करपाच्या प्रस्तावा बगर खासगी सुवातेंत उक्ती सुवात/मैदानाचो उल्लेख.
– उदरगत/प्रकल्पांंक योग्य वाठाराचो बिगर निवासी वाठारांत जाल्लो आस्पाव.
– निवासी वाठारा लागचो जागो बिगर निवासी वाठारांत जाल्लो आस्पाव.
– उद्देगीक वाठाराचो बिगर निवासी वाठारांत जाल्लो उल्लेख.
– रानां वाठाराचो बिगर रानां वाठारांत जाल्लो आस्पाव.
– 2001च्या आराखड्यांत निवासी वाठारांतलाे जागो शेती वाठारांत घातलो जाल्यार.
– एखादो जाग्याचेर प्रकल्पाचो प्रस्ताव वा सनद जारी केली जाल्यार ताची दुरुस्ती करपाक हरकत ना.
शेतांं, खाजन जमीन आसल्यार दुरुस्ती ना
सखल वाठारांतली शेतांं, पाणथळ वाठार, देंवतीची सुवात, खासगी रानांची सुवात, अभयारण्या कुशीचो बफर झोन, कूश शेतीची जाग्या संबंंदी प्रादेशीक आराखड्यांत बदल वा दुरुस्ती करपाक मेळची ना.
सीआरझॅड वाठारांतल्या जाग्याच्या दुरुस्ती खातीर दर्यादेग वेवस्थापन प्राधिकरणाचें मत विचारांत घेवचें पडटलें. उदका पुरवण प्रकल्पाची सुवात आसली जाल्यार काडा (कमांंड एरीया डेव्हलोपमेंट अॅथोरिटी) ची मान्यताय घेवची पडटली.
प्रादेशीक आराखड्यांत दुरुस्ती वा बदल करतना आवश्यकताये प्रमाण शेती खातें वा रानां खात्याचो सल्लो घेवचो पडटलो.
प्रादेशीक आराखड्यांत बऱ्याेच चुको जाल्यात. निवासी वाठारांतले जागे बिगर निवासी वाठारांत दाखयल्यात. रस्ते आसा ते परस रूंंद दाखयल्यात. हाका लागून प्रादेशीक आराखड्यांत दुरुस्ती करपाची प्रक्रिया सरकारान सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
