भांगरभूंय | प्रतिनिधी
पेडणे ः आतां मेरेन खंयच्याच सरकारान पेडणे तालुक्याच्या खेळगड्यांक शारिरीक फिटनेस आनी वेगवेगळ्या प्रकारच्या खेळां वांगडाच वेगवेगळे प्रकारचें प्रशिक्षण दिवपाचो यत्न केल्लो ना. वट्ट 37 कोटी रुपया खर्च करून पेडणें तालुक्या खातीर इंडोर स्टेडियम बांदिल्लो. जीएमआर कंपनीक हो स्टेडियम भाड्यान दिवचे पयलीं गांवांतली मैदान दुरुस्त करप गरजेचें आशिल्लें. पूण तशें करिनासतना सरकारान खेळगड्यांचेर अन्याय केलां. नोव्हेंबरांत राष्ट्रीय सर्त जावपाची आसा. पूण ते खातीर पेडणे तालुक्यांत खेळो इंडिया खातीर एकूय मैदान ना ही दुख्खाची गजाल.
पेडणे तालुक्यांत मोरजी, आगरवाडा तुये, वारखंड ह्या सारक्या सुवातींनी मैदान आसात, पूण त्या मैदानाची स्थिती भिरांकूळ जाल्यात. दुसरे वटेन कोरगांवांत मैदानाचे काम सुरू जालां. खेळो इंडिया खाला मांद्रें हांगा 50 कोटी रुपया खर्च करुन बरी सुसज्ज बहुउद्देशीय खेळां प्रकल्प स्थापन करतले. पूण सावळवाडा- पेडणें हांगा सुसज्ज आशिल्लें इंडोर स्टेडियम मोपा विमानतळ कंपनीक भाड्यान दिवन सरकारान खेळगड्यांचेर अन्याय केला.
हाचेर प्रतिक्रिया दितना आल्बर्ट फर्नांडीस ह्या थळाव्या मनशान सांगलें, सरकारान बेगोबेग उपाय करचे आनी ह्या मैदानाचेर सगल्या तरेच्यो सुविधा उपलब्ध करच्यो. ह्या जाग्यार वेगवेगळीं सर्ती घडोवन हाडटात. पूण सर्तीच्या वेळार मैदानाचेर आयोजकांक सुविधा दिवपाक कशी अडचणी निर्माण जातात तें आमी जाणात. राश्ट्रीय सर्ती वांगडाच सरकारान गांवांतल्या मैदानांची दुरुस्ती करची, अशी मागणी आल्बर्ट फर्नांडिस हाणें केली.
मोरजी मैदानाची स्थिती वायट आसा. पंचायतीन हे मैदान दुरुस्त करपाचे यत्न केले. आतां सरकारान हाचेर लक्ष दिवन हे मैदान बेगोबेग दुरुस्त करून खेळगड्यांक प्रोत्साहन दिवचें अशी प्रतिक्रिया मोरजीचे आदले उपसरपंच आनी सत्पुरुष स्पोर्ट्स क्लबाचे अध्यक्ष अमित शेटगांवकार हांणी उक्तायली.
थळावो पंच वांगडी आनी उपसरपंच आनी खेळगडो पवन मोरजे हांणी प्रतिक्रिया दितना सांगलें, दर खेपे सर्त घडोवन हाडटना ह्या मैदानाचेर भियेवंत खेळचें पडटा. संरक्षण वण्टी कोसळ्ळ्यात. बसपाची वेवस्था इबाडल्या. ह्या मैदानाचेर जायत्यो खबरो उजवाडाक आयल्यो. खेळां मंत्री गोविंद गावडेन आतां हे खबरेची दखल घेतला आनी नोव्हेंबर उपरांत ह्या मैदानाचे काम सुरू करतले, अशें आश्वासन दिलां अशें उपसरपंच पवन मोरजे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
