भांगरभूंय | प्रतिनिधी
भांगरभूंय । प्रतिनिधी
पेडणेः पेडणेच्या अबकारी कार्यालयांत मद्य परवानें नूतनीकरण अर्थीक घोटाळ्यांत जे कोण घुस्पल्यात तातूंतल्या कोणाक सोडचे नात. कायद्या प्रमाण तांचेर कारवाय करतले अशें मुख्यमंत्री डॉ प्रमोद सावंत हांणी पेडण्यांतल्या थळाव्या पत्रकारांक सांगलें. मोपा विमानतळ पुलीस स्टेशनाचे इमारतीचें उक्तावण करपा खातीत ते पेडण्या आयिल्ले.
ह्या प्रकरणांत तीन कर्मचाऱ्यांक निलंबीत केल्यात आनी तांची दक्षता खात्या वतीन चवकशी सुरू आसा. पेडणे अबकारी कार्यालयांत मद्य परवान्यांचें नूतनीकरण करपा खातीर वेवसायिकांनी भरिल्ल्या सुमार दोन कोटी रुपयांचो घोटाळो जाला. वरिश्ठ कारकून हरीश नाईक हाचे सयत अबकारी निरीक्षक दुर्गेश नायक आनी विभूती शेट्ये हांका ते खातीर निलंबीत केलां. जे दुबावीत आसात तांचे आड अजून गुन्यांव किद्याक नोंद करूं ना अशें पत्रकारांनी विचारलें तेन्ना पुराय चवकशी केल्या उपरांत तांचेर कायदेशीर कारवाय करतले अशें मुख्यमंत्र्यांनी सांगलें.
मजगतीं, काँग्रेस पक्षाचे फुडारी संजय बर्डे हांणी ह्या घोटाळ्याक अबकारी आयुक्त नारायण गाड हांका जापसालदार धरून तांचे आड पेडणे पुलीस स्टेशनांत जरी कागाळ केल्या तरी पुलिसांनी ती अजून नोंद करून घेतली ना. मुख्यमंत्री डॉ सावंत हांचे कडेन अबकारी खात्याचो ताबो आसा. ते गुन्यांवकारांक साल्वार करपाक सोदतात असो आरोप बर्डे हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
