भांगरभूंय | प्रतिनिधी
पेडणें : पेडणें भूतनाथ दोंगर आनी पेडणें पालिका कोयर प्रकल्पा शेजराक जावपी थीम प्रकल्पाक खर विरोध जाता. तशेंच अर्थीक गुंतवणूक म्हामंडळान दिल्ले परवाने फाटीं घेवचे अशी मागणी जातना पळोवपाक मेळटा. जनहिता आड जावपी खंयच्याच प्रकल्पाक परवानगी दिवचे ना, असो निर्धार इन्व्हेस्टमेंट प्रमोशन बोर्ड अन्याय निवारण समितीचे बसकेंत केलो.
भुतनाथ वाठारांत थीम प्रकल्पाच्या अर्थीक गुंतवणूक बोर्डान मान्यताय दिल्या. हो प्रकल्प कसलो आसतलो, हाचो पेडणेंकारांक कितें फायदो जातलो, हातूंत कसले उपक्रम राबयतले हें विशीं पेडणेंकारांक कांचय म्हायती नाशिल्ल्यान बसकेंत ह्या प्रकल्पाक विरोध केलो.
नागरीक समितीची थीम पार्क प्रकल्पा विशीं चर्चा करपाक एक म्हत्वाची बसका काल श्री भगवती हायस्कूल सभाघरांत जाली. ह्या वेळार प्रकल्पाच्या नांवा खाला पेडणेंकारांक बरेच वायट परिणाम सोंसचे पडटले. अशे तरेचे प्रकल्प येवपाचो भंय उक्तावन सरकारान ह्या प्रकल्पाक दिल्लो परवानो फाटीं घेवपाची मागणी जाली.
हे म्हत्वाचे बसकेक भारत बागकार, सदानंद वायंगणकार, दत्ताराम कासकार, सूर्यकांत, राजन कोरगांवकार, रामचंद्र गावडे, भास्कर नारुलकार, जितेंद्र गांवकार, उदय महाले, प्रदीप नायक, सिल्वेष मांजरेंकार, शिवानंद तांबोसकार, नारायण शिरोडकार, शंकर पवार, कृष्णकुमार परब, विजय विर्नोडकार, महादेव पटेकार, रमाकांत तुळसकार, सुरेश परब, सुनील नायक, निलेश पटेकार, साईनाथ आपुले, नंदकुमार मालवणकार, श्रीकृष्ण उंबरकार, गजानन सावळ देसाय, प्रणव परब आनी हेरांनी ह्या प्रकल्पा संबंदी विवीध सुचवण्यो केल्यो. तशेंच फुडाराक हो प्रकल्प कशे तरेन धोक्याचो थारतलो हे विशीं चर्चा केली. ह्या वेळार सगळ्या हाजीर आशिल्ल्या नागरिकांनी, प्रकल्पा खातीर सरकारान कसलेच तरेचे परवाने दिवचे न्हय आनी जो परवानो दिला तो फाटीं घेवचो अशी खर मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
