भांगरभूंय | प्रतिनिधी
इंचा परसूय उण्या पावसाची गरज; स केंद्रांचेर हुंपलो शेंकडो
पणजीः इंचचो शेंकडो पुराय करचे खातीर पावसाक फक्त एका इंचा परसूय उण्या पावसाची गरज आसा. पूण 98 इंचा उपरांत पावस गायब जालो. इंचांच्या शेंकड्या खातीर गोंयकार आठ दिसां सावन वाट पळयतात. मजगतीं, गोंयांतल्या 13 तल्या 6 केंद्रांचेर पावसान इंचांचो शेंकडो पुराय केला, जाल्यार दोन केंद्रांचेर शेंकड्याच्या हुमऱ्यार आसा.
शेनवारा सकाळीं 8.30 वरां मेरेन गोंयांत वट्ट 99.82 इंच पावसाची नोंद जाल्या. 1 जून ते 5 ऑगस्ट ह्या काळांत सरासरी 83.75 इंच पावस पडटा, पूण अंदूं हे सरासरींत 19 टक्के इतली वाड जाल्या. अंदूं गोंयांत मान्सून उसरां म्हणल्यार 12 जूनाक पावलो. ते उपरांत सुमार 10 दीस पावस पडलोच ना. 22 जूनाच्यान गोंयभर पावसान नेट धरलो. उपरांत मात 28 जुलय मेरेन एकसारको घोग्यांनी कोसळत रावलो. ताका लागून सरासरी पावसांत व्हड प्रमाणांत वाड जाल्ली.
एकसारको पडिल्ल्या पावसाक लागून गोंयांतलीं सगळींच धरणां ओव्हरफ्लो जालीं. 28 जुलय मेरेन पावसाचो नेट कायम उरलो. ते मेरेन पावस 98 इंचा मेरेन गेल्लो. पावसाचो नेट पळयत जाल्यार दुसऱ्याच दिसा पावस इंचांचो शेंवडो हुपतलो, इशें दिसतालें. पूण त्या दिसा सावन पावस गायब जालो. फाटल्या आठ दिसांत कांय वाठारांनी पावस शिडशिडलो, पण तो दोन इंच लेगीत जावंक ना. ताका लागून पावसाचो अजून शेंकडो पुराय जावंक ना. शेनवारा राती कडेन पावस वडलो जाल्यार मात कांय वेळा भितर पावस इंचांचो शेंकडो पुराय करतलो.
आतां मेरेनचो पावस (इंचांनी)
म्हापशें 92.82
पेडणें 101.10
फोंडें 102.22
पणजी 93.58
पोरणें गोंय 94.53
सांखळी 99.24
वाळपय 113.02
काणकोण 94.87
दाबोळी 85.51
मडगांव 103.27
मुरगांव 84
केपें 112.55 सांगें 115.12
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
