भांगरभूंय | प्रतिनिधी
भांगरभूंय । प्रतिनिधी
दिवचल: सांखळे मतदारसंघांत खुबशे नवे प्रकल्प सुरू करपा खातीर विशेश लक्ष दिलां. तांतलो एक धा कोटी रुपया खर्चून बांदिल्लो जलशुद्धीकरण प्रकल्प. हो प्रकल्प पाळी, सुर्ला, वेळगेंच्या लोकांची तान भागयतलो. सरकार राज्यांतले चाळीस टक्के जनतेक फुकट उदकाची पुरवण करता. सरकाराचे तिजोरेचेर चड भार दिनासतना विवीध माध्यमां वरवीं नवे प्रकल्प उबे करपाक आमी यत्न करतात. ताका लागून बर्या प्रकल्पांक जनतेन आडमेळें हाडपाची मानसिकताय सोडून दिवची, असो उलो मुख्यमंत्री डॉ. प्रमोद सावंत हांणी पाळी हांगा दिलो.
जिल्हो खनीज निधींतल्यान उबारिल्लो आनी पाळी, वेळग्यां, सुर्ला ह्या तीन पंचायतींक फिल्टर उदकाची पुरवण करपी उदका प्रकल्पाचो लोकार्पण सुवाळ्याक मुख्यमंत्री उलयताले.
नवे प्रकल्प चालीक लावपाचेर सरकार खासा लक्ष दिता. खण खंदकांचें उदक वापरून सरळ कुळागरांत सोडपाचो सुर्ला हांगाचो चार कोटी रुपयांचो प्रकल्प हो देशांतलो असलो पयलो प्रयोग आशिल्ल्याचें मुख्यमंत्र्यान सांगलें.
मुख्यमंत्र्यान समाधान उक्तायलें
पाळी, सुर्ला, वेळगें ह्या वाठारांतलो उदका प्रस्न सोडोवपाक फाटलीं कितलींशींच वर्सां जालीं आपूण यत्न करतां. आतां हो प्रस्न सुटिल्ल्यान ह्या वाठारांत जाय तितलें उदक लोकांक मेळटलें हाचेर तांणी समाधान उक्तायलें.
सरकाराक मजत करतना उदक फुकट मेळटा म्हणून तें गाडयो धुवपाक, झाडां शिपपाक वापरचें न्हय. हीं सगळीं कामां करपाक तुमचे बांयचें उदक वापरचें असो सल्लो मुख्यमंत्र्यान दिलो.
ह्या वेळार अभियंते आगा तशेंच प्रकल्पाक जमीन दिवपी जमीनदार हांकां मुख्यमंत्र्यान विशेश परबीं भेटयली. ह्या वेळार मुख्यमंत्री डॉ. सावंत हांचे वांगडा मुखेल सचीव पुनीत कुमार गोयल, प्रधान मुख्य अभियंता उत्तम पार्सेकार, जिल्होधिकारी मामू हागे, गोपाळ सुर्लकार, गौरांगी परब, शिवदास मुळगांवकार आनी हेरांचे हाजेरींत ह्या उदका प्रकल्पाचें उक्तावण जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
