भांगरभूंय | प्रतिनिधी
-कर आकारणीचेर पालिकांचे नियंत्रण नाः विजय
पणजी: पालिका वाठारांत खुबशीं बेकायदो वेवसायीक आस्थापनां आनी प्रकल्प उबारतात. पूण ताची नोंद पालिके कडेन नासता. तांचे कडल्यान पालिकेक कर मेळना. हे खातीर पालिकेक तांचे कडल्यान महसूल मेळना. तशेंच राज्यांतल्या पालिकांनी लोकां कडल्यान कितली घरपटी, कोयरपटी घेवची, हाचेर कसलेच कायदेशीर नियंत्रण ना. ताका लागून दरेक पालिका स्वतंत्रपणान स्वताक जाय ते पद्दतीन कर आकारणी करतात. हातूंत कसलीच सुसुत्रताय ना. ते खातीर वर्गवारी प्रमाण पालिकांनी कितलो कर आकारचो, हे विशीं कायदो करतले, अशें ठोस आस्वासन नगरविकास मंत्री विश्वजीत राणे हांणी दिलें. सभाघरांत प्रस्न वराच्या काळांत आमदार विजय सरदेसाय हांणी म्हत्वाचो प्रस्न उपस्थीत केलो. ताचेर मंत्री राणे हांणी जाप दिल्या.
ह्या प्रस्नाक जाप दितना नगरविकास मंत्री विश्वजीत राणे हांणी लोकां कडल्यान राज्यांतल्या पालिकांनी कितली घरपटी, कोयरपटी घेवची हाचेर कसलेच तरेचो कायदो सध्या ना. ताका लागून दरेक पालिका स्वतंत्रपणान जाय तसो कर आकारतात. हातूंत कसलेच तरेचीं एकसुत्रीपणां ना. देखून वर्गवारी प्रमाण पालिकांनी कितलो कर घेवचो हाचेर कायदो करतले अशें आस्वासन तांणी दिलें.
ह्या वेळार आमदार दिगंबर कामत हांणी पालिकेच्या कर आकारणीचेर नियंत्रण दवरपा खातीर नेम करपाची मागणी केली.
मजगतीं, पालिका कायद्यांत सुदारणा करप गरजेचें आसा. एकाद्या पालिकेन नेमको कितलो कर आकारचो, हे विशीं कसलोच नेम ना. ते खातीर नेम तयार करून ते प्रमाण अ, ब, क ह्या वर्गवारी प्रमाण संबंदीत पालिकांनी कर कशे आकारचे, हे विशीं कायदो निश्चीत करतले,अशें मंत्री राणे हांणी सांगलें.
तशेंच सगल्या पालिकांनी जीआयएस मॅपींग करतले. जाका लागून उबारिल्ल्या बांदकामांचो निश्चीत डाटा सरकाराक मेळटलो. तातूंतल्यान संबंदिता कडल्यान योग्य तो महसूल वसूल करतले, अशेंय राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
