भांगरभूंय | प्रतिनिधी
म्हापशें: पर्वरी पुलिसांनी घरफोडी आनी भांगराच्यो सरपळ्यो झोमून व्हरपाचे चोरयेंतले आंतरराज्य टोळयेंतले राजू सेल्वाराज तांगराज (37, रा. साळगांव, मूळ हुबळी- कर्नाटक) आनी भीमगुंडा मारुती पाटील (30, रा. गडहिंग्लज- महाराष्ट्र) ह्या दोगां दुबावीत चोरांक अटक केल्या. दुबावितां कडल्यान 1.93 लाख रोख, 50 हजारांचें भांगर आनी दोन वाहनां मेळून 10 लाखांचो म्हालवज जप्त केला.
फाटल्या 15 जानेवारी दिसा कागाळदार सुमन राव (बांबोळी) हे जाण्टे बायलेचें पर्वरे जिवोत्तम मठा सामकार दोगां अनवळखी मोटारसायल चालकांनी 2 लाख 99 हजार रुपयांचें मंगळसुत्र झोमून व्हेल्लें. ह्या प्रकरणाची पर्वरी पुलिसांनी सीसीटीव्ही आनी हेर तंत्रज्ञानाच्या आदारान चवकशी सुरू केली. ते प्रमाण शुक्रारा सकाळीं वयल्या दोनूय दुबावीत आरोपींक पुलिसांनी पिळर्णां सांपळो रचून अटक केली.
ह्या वेळार दुबावितां कडेन 1 लाख 93 हजार रुपया रोख, मुदी, आनी कानांतलीं ह्यो 50 हजार रुपयांच्यो भांगराच्यो वस्ती, तशेंच चोरये खातीर वापरिल्ली केटीएम डूक दुचाकी आनी वॉल्सवागन जेट्टा मोटार मेळून 10 लाखांचो म्हालवज जप्त केलो.
मजगतीं, दुबावितांचो गोंय, बेळगांव आनी कोल्हापूर ह्या वाठारांनी घरफोडी आनी भांगराच्यो सरपळी झोमून व्हरपाच्या प्रकरणांत आस्पाव आशिल्ल्याचें उक्तडार आयलां. दुबावितां कडेन सांपडिल्ली रोख रक्कम ही भांगर विकून मेळिल्ली अशेंय चवकशेंतल्यान स्पश्ट जालां.
पुलीस अधिक्षक शोबीत सक्सेना, उपअधिक्षक विश्वेश कर्पे हांच्या मार्गदर्शना खाला निरिक्षक अनंत गांवकार हांच्या फुडारपणा खाला उपनिरिक्षक सीताराम मळीक, प्रणिता मांद्रेंकार, कॉन्स्टेबल नितेश गावडे, विराज मळीक आनी पुलिसांनी ही कामगिरी केली.
दुबावीत आरोपींनी चोरये खातीर वापरिल्ली मोटारसायकल ही नवी खरेदी केल्ली. ती येरादारी खात्यांत नोंदणी करिनासतनाच बनावट नंबरप्लेट लावन चलयताले. जाल्यार जप्त केल्ली मोटार एचआर 26 सीएफ 7871 ही दुबावीत राजू तांगराज हाच्या बायलेच्या नांवार आसून ती दिल्लींतल्यान खरेदी केल्ली. ताका लागून ह्या मोटारी विशींय पुलिसांनी दुबाव उक्तायला. ह्या प्रकरणांत अजून एक दुबावीत फरार आसा. दुबावीत राजू हाका वाळपय आनी हेर पुलिसांनी वेगळ्यावेगळ्या गुन्यांवां खाला अटक केल्ली. तोच मुखेल सुत्रधार आसून आपल्या दुबावीत वांगड्यांक आपोवन चोरयो करतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
