भांगरभूंय | प्रतिनिधी
स्थितीचो अहवाल न्यायालयांत करतले सादर
मडगांव : सोनसडो कोयर यार्डांतल्या उजो लागपाच्या आनी अापत्कालीन घडणुकांचो उल्लेख करून जिल्हो आपत्कालीन वेवस्थापनाचे अध्यक्ष तशेंच दक्षीण गोंय जिल्होधिकारी हांकां न्यायालयान प्रत्यक्ष पळोवणी करून मंगळारा न्यायालयांत अहवाल सादर करपाक सांगलां. न्यायालयाच्या सुचोवणे प्रमाण जिल्होधिकारी अश्वीन चंद्रू ए (आयएएस) हांणी सोनसडोंतल्या कोयर प्रक्रिया, कोयर सांठवणुकीच्या इमारतीच्या स्थितीचो नियाळ सोमारा दनपारां घेतलो.
उच्च न्यायालयाच्या गोंय खंडपिठा कडल्यान सोनसडो कोयरा विशींचे याचिकेचेर सुनावणी घेतनाच सातत्यात जावपी उजो लागपाच्यो घडणुको, कोयर प्रक्रियेंतल्यो त्रुटी, साधनसुविधा उबारणी खातीर जावपी कळाव हाचो उल्लेख केलो. ह्या वेळार दक्षीण गोंय जिल्हो आपत्कालीन वेवस्थापन यंत्रणेचे अध्यक्ष आशिल्ल्या जिल्होधिकारी अश्वीन चंद्रू ए हांकां सोनसडो कोयर यार्डाक प्रत्यक्ष भेट दिवन थंयची परिस्थिती प्रत्यक्ष जाणून घेवपाची सुचोवणी केली. तशेंच परिस्थिती विशींचो मंगळारा न्यायालयांत अहवाल दिवपाक सांगलें.
न्यायालयाच्या आदेशा प्रमाण जिल्होधिकाऱ्यांनी दनपारां सोनसडो कोयर यार्डाक भेट दिली. ह्या वेळार तांचे वांगडा उपजिल्होधिकारी दीपक देसाय, पालिका अभियंता अानी हेर अधिकारी हाजीर आशिल्ले.
दक्षीण गोंय जिल्होधिकारी अश्वीन चंद्रू हांणी सोनसडो कोयर यार्डाची पळोवणी केली. त्या वेळार वाठारांत कोयर पातळिल्लो. ओलो आनी सुको कोयर सांठवणूक केल्ल्या इमारती विशीं जिल्हाेधिकाऱ्यांनी पालिका अभियंत्या कडल्यान म्हायती घेतली. इमारतीच्यो दोनूय वटेनच्यो वणटी पडिल्ल्यो आसून हे इमारतीचें ‘स्ट्रक्चरल ऑडीट’ केला वा ना असो प्रस्नूय जिल्होधिकाऱ्यांनी केलो.
तशेंच इमारतीच्यो वणटी कोसळून वर्स जाले, ह्या काळांत कितें उपाय येवजण्यो केल्यो हाची म्हायती घेतली.
उजो लागपाच्यो घडणुको खंयचे सुवातेर घडटात हाची विचारणा केली. तशेंच चिखल आसुनूय जिल्होधिकाऱ्यांनी अधिकाऱ्यां सयत प्रकल्पाचे दुसरे वटेन वचून पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
