भांगरभूंय | प्रतिनिधी
मध्यप्रदेशांत परिपत्रक, युरी आलेमांव हांणी केलो निशेध
मडगांव, प्रतिनिधी : शाळांतल्या भुरग्यांनी खंयच्याच नाताळ उत्सवांत वाटो घेवचो न्हय, ख्रिसमस ट्री सजोवप, सांताक्लॉजा वरीं कपडे घालचे न्हय, अशें परिपत्रक मध्यप्रदेशांतल्या शाजापूर जिल्हो शिक्षणाधिकाऱ्यान काडलां. हे नेम मोडल्यार कारवायेची शिटकावणीय दिल्या. हातूंतल्यान देख घेवन गोंयकारांनी सादूर रावचें, असो उलो विरोधी पक्ष फुडारी युरी आलेमांव हांणी मारलो.
शाळांनी नाताळां मनोवपाचेर बंदी हाडपी मध्यप्रदेशांतल्या शाजापूर जिल्हो शिक्षणाधिकार्यांनी जारी केल्ल्या परिपत्रकाचो संदर्भ दिवन युरी आलेमांव हांणी भाजप सरकाराचेर हुकूमशाय चलयल्ल्याचो आरोप केला.
भुरग्यांक भारतांतल्यो सगळ्यो परबो उमेदीन मनोवपाक दियात. दरेक परब आनी संस्कृतायेचो आदर करपी सर्वसमावेशक समाज आसप गरजेचें. परब आनी परंपरांक राजकी अजेंडां पसून पयस दवरप म्हत्वाचें, अशें युरी आलेमाव हांणी फुडें म्हणलें. गोंयकारांनी ह्या परिपत्रका कडेन जतनायेन पळोवचें. फुडाराक हेंच जातलें. हें आतां पुराय देशभर पातळूं शकता. हाचे आड एकवटान उबें रावपाची गरज आसा. मध्यप्रदेश भाजप सरकारान जारी केल्ल्या परिपत्रकांत अजाप करपा सारकें कांयच ना. गोंयचें भाजप सरकारूय तेच दिकेन वळटा. तांणी पयलींच गोंयचें लग्न आनी कुटुंबीक कार्यावळींचेर निर्बंध घालपाक सुरवात केल्या, अशें आलेमांव हांणी पत्रकांत म्हणलां.
२०२४ त लोकशाय आनी मोलादीक हक्कांचें संरक्षण करपा खातीर कटिबद्ध रावचें. हुकूमशाय राजवटीक हारोवपा खातीर एकवट गरजेचो असो उलो आलेमांव हांणी गोंयकारांक मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
