नवीन वर्साचे पयलेच दिसां चार अपघात, चवगांक मरण
भांगरभूंय | प्रतिनिधी
पणजी ः पणजें मळ्यांत आयज सकाळीं बुलेट मोटारसायकल फोंडकुलांत पडून आयुष रुपेश हळर्णकार (21, रायबंदर) हाका मरण आयलें. रस्त्याचें काम चालू आशिल्ल्या जाग्यार एका फोंडकुलांत मोटारसायकल पडून थंयच आडकून उरिल्ल्यान ह्या तरणाट्याक मरण आयलें.
ताळगांव जाल्ल्या दुसऱ्या अपघातांत जिप्पी भगत (22) ह्या तरणाट्याक मरण आयलें. ताका अपघाता उपरांत जखमी अवस्थेंत जीएमसींत व्हरतना मरण आयलें.
आयज सकाळीं वाळपयच्या हनुमान देवळा लागसार कार आनी दुचाकी मदीं अपघात जालो. ह्या अपघातांत उल्हास गांवकार (32, डोंगुर्ली-ठाणे) हाका मरण आयलें. सकाळीं स्कुटरी वयल्यान तो फोंडें पुलीस स्टेशनांत ड्युटेक वतालो तेन्ना हो अपघात जालो आनी ताका मरण आयलें.
ते भायर काल रातीं मुस्लिमवाडो भोमा हांगा स्कुटरीचो लायटीच्या खांब्याक धपको लागून प्रतिम रोमन बोरा (31, मुस्लिमवाडो, मुळ आसाम) हाका मरण आयलें. कालूच ताचो वाडदीस आसलो. वाडदिस मनोवपाची तांणे पुराय तयारी केल्ली. तो स्कुटर घेवन इश्टां खातीर बियरी हाडपाक वतालो. पूण कांय अंतराचेर गेले उपरांत स्कुटरीन महानंदू हायस्कुलाच्या मुखार आशिल्ल्या खांब्याक धपको दिलो. हांतूत तो गंभीर जखमी जालो. हॉस्पिटलांत व्हरतना वाटेक ताका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
