भांगरभूंय | प्रतिनिधी
1 कोटींचें भांगर आनी 50 हजार रोख जप्त
दुबावितां मदीं एके बायलेचो आस्पाव
मडगांव: धांवते रेल्वेंत चोरी करपी आंतरराज्य चोरांचे टोळयेक महाराष्ट्र आनी कर्नाटक पुलिसांच्या आदारान कोंकण रेल्वे पुलिसांनी चार दुबावितांक अटक केली. तांचे कडल्यान चोरयेचे 1 कोटींचें भांगर आनी 50 हजार रोख रक्कम जप्त केल्या.
काणकोण रेल्वे स्टेशनार गाडी क्रॉसिंगा खातीर राविल्ली आसतना 2 मे 2023 दिसा 4 कोटी रुपया मोलाचें 7 कील भांगराच्यो वस्ती आशिल्ली बॅग अनवळख्यांनी चोरी केली. संपत जैन हांचे कडेन काम करपी अशोक आर. हाणें ह्या प्रकरणांत कोंकण रेल्वे पुलीस स्टेशनार कागाळ नोंद केल्ली.
कोंकण रेल्वे पुलीस उपअधिक्षक गुरुदास कदम हांणी पुलीस निरिक्षक सुनील गुडलर आनी वांगड्यांच्या सांगातान तपासाक सुरवात केली. दोन पंगडांची स्थापणूक करून कर्नाटक आनी महाराष्ट्रांत ह्या प्रकरणाचो तपास केलो.
महाराष्ट्रांतल्या कवठे महांकाळ सांगली सावन संदीप वसंत भोसले (40, रा. कवठे महांकाळ) आनी अक्षय राम चिनवल (28, रा. खानापूर, बेळगांव) ह्या दोगांक 28 जून दिसा ताब्यांत घेतले. तांचे कडेन अशिल्ल्या शेवोर्लेट क्रुझ आनी मारुती रित्झ ह्या दोन मोटारीं सयत दोन म्हारग मोबायल सांपडले. दुबावितांक अटक करून काणकोण न्यायालयांत हजर करतकूच 29 जून मेरेन न्यायालयान पुलीस कोठी दिली.
चवकशे वेळार अर्चना मारे (42, रा. तलोजा, नवी मुंबय) हिचें नांव मुखार आयलें. भांगराच्यो वस्ती नेमक्यो केन्ना येतल्यो हाची म्हायती अर्चना मोरेन दुबावीत संदीप भोसले आनी अक्षय चिनवल हांकां दिल्ल्याचें मुखार आयलें.
कोंकण रेल्वे पुलिसांनी मुंबय वचून ओशिवारा पुलिसांच्या आदारान 1 जुलय दिसा ताब्यांत घेवन तिची चवकशी करून अटक केली. दुबावीत अर्चना मोरे कडल्यान मेळिल्ले म्हायती प्रमाण हे चोरयेंत सांगाती आशिल्लो दुबावीत धनपत हंसराज बैद (44, रा. परेल ईस्ट, मुंबय) हाका अटक केली.
अटक केले उपरांत दुबावितां कडल्यान 1900 ग्राम वजनाचें सुमार 1 कोटीचें वितळिल्ल्या स्वरुपांतले भांगराचे बार आनी 50 हजार रुपया रोख रक्कम जप्त केली. कोंकण रेल्वे पुलिसांनी संदीप वसंत भोसले (कवठे महांकाळ), अक्षय चिनवल (खानापूर, बेळगांव), अर्चना उर्फ अर्ची मोरे (तलोजा, मुंबय), धनपत बैद (परेल ईस्ट, मुंबय) हांकां काणकोण न्यायालयांत सोमारा हजर केले. चारूय दुबावितांक चार दीस पुलीस कोठी दिल्या.
ह्या प्रकरणांत कोंकण रेल्वे पुलीस उपअधिक्षक गुरुदास कदम, पुलीस निरिक्षक सुनील गुडलर आनी तांच्या पंगडा कडल्यान वरिश्ठ अधिकाऱ्यांच्या मार्गदर्शना खाला फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
