धरजीत नायक गेलो तरी खंय?
भांगरभूंय | प्रतिनिधी
घरच्यांक अपहरण जाल्ल्याचो दुबाव
भांगरभूंय । प्रतिनिधी
पणजी: ‘आपल्याक आरामाची गरज आसा’ अशें सांगून तो गेलो आनी परत आयलोच ना. हय, उसगांव रेंज फॉरेस्ट अधिकारी धरजीत अनंत नायक (नागेशी-फोंडें) हे 11 जुलयाक सावन बेपत्ता आसात. तांची गाडी मिरामार हांगा मेळ्ळी. निमाणो फोन तांणी आपले घरकान्नीक केलो आनी ताचे उपरांत तो ना जालो. ताच्या घरच्यांनी ताचें अपहरण जाल्ल्याचो दुबाव उक्तायला. हे विशीं फोंडें पुलीस फुडलो तपास करतात.
मजगतीं, फाटल्या कांय दिसां सावन धरजीत हांकां कसलो तरी ताण आशिल्ल्याचें समजतालें. 11 जुलयाक ते घरच्यान भायर सरिल्ले. घरच्यान भायर सरतना तांणी ‘आपूण आयज कॉटेजीर रावतलों’ अशें घरच्यांक सांगिल्लें. तांणी आपले घरकान्नीक निमाणो फोन 11वेर रातचो केल्लो आनी ताचे उपरांत ताचो फोन बंद येवपाक लागलो. दोन दिसां उपरांत तांच्या कुटुंबियांनी ताचें अपहरण जाल्ल्याची कागाळ फोंडें पुलीस स्टेशनाचेर केली. नागेशीं फोंडें हांगा रावपी धरजीत नायक हे उसगांव हांगा वन खात्याचे रेंज फॉरेस्ट अधिकारी जावन आसात.
धरजीत नायक हे नक्की खंय गेले हाचो तपास सध्या फोंडें पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
