भांगरभूंय | प्रतिनिधी
पणजी: दोन भावांच्या न्यायालयांतल्या वादाक लागून आतां दर्यादेग वाठारांत अतिक्रमण करून झोंपड्यो तशेंच हेर बांदकामां करप्यांक बरोच फटको बसला. एका भावान पर्यटन खात्याच्या जमनीचेर अतिक्रमण करून झोंपडी उबारिल्ल्याचो ठपको दवरिल्ल्यान हेर सगल्याच अतिक्रमणाचो मुद्दो वयर सरला. हाका लागून कळंगूट वाठारांत बेकायदो उबारिल्ल्यो 200 परस चड झोंपड्यो काडटले अशें राज्य सरकारान मुंबय उच्च न्यायालयाच्या गोंय खंडपिठांत स्पश्ट केलां.
कळंगूटे नुस्तेमारी करपी दोन भावां मदीं कनिश्ठ न्यायालयांत आदीं सावनूच मालमत्तेचो वाद सुरू आसा. तातूंतच एका भावान पर्यटन खात्याचे सुवातेर अतिक्रमण करून व्हडीं दवरपा खातीर झोंपडी उबारिल्ल्याचो मुद्दो उपस्थीत करून दुसर्या भावा आड खंडपिठांत याचिका दाखल केल्या. हे याचिकेचेर सुनावणी घेतना प्रतिवादी भावान याचिकादाराचेर उरफाटो आरोप केला.
‘म्हजेच कित्याक भावानूय पर्यटन खात्याचे सुवातेंत बांदकाम केलां’ असो मुद्दो ताणें उपस्थीत केलो. उपरांत उच्च न्यायालयान पर्यटन खात्याक ताची पळोवणी करपाचो आदेश दिल्लो. हे पळोवणेंत याचिकादारानूय घराची सोंपणा बांदतना अतिक्रमण केल्ल्याचें पर्यटन खात्याक दिसून आयलें.
होच युक्तिवाद चालू आसतना ‘अशे तरेन गोंयांतल्या सगल्या दर्यादेगांचेर अतिक्रमण आसा’ असो मुद्दो उपस्थीत जालो. हाचेर बुधवारा सुनावणी जाली तेन्ना, दोनूय भावांनी अतिक्रमण केल्ल्याचें मान्य करीत तीं अतिक्रमणां दोन सप्तका भितर स्वता जावन कुशीक काडटले अशें कबूल केलें. पूण त्याचवेळार न्यायालयान पर्यटन खात्याक हेर अतिक्रमणां विशीं विचारणा केली. तेन्ना पर्यटन खात्यान तांचेर कारवाय करपा खातीर दोन म्हयन्यांचो वेळ मागून घेतला. ताका लागून कळंगूट वाठारांत अतिक्रमण केल्ल्या 200 परस चड झोंपड्यांचेर कारवाय जातली हें आतां स्पश्ट जालां.
ह्या प्रकरणांत उमतावाडो-कळंगूटेचो इनासियो कुरैय हाणें खंडपिठांत याचिका दाखल केल्या. तातूंत तांणी पर्यटन खात्या सयत भाव फ्रान्सिस्को कुरैय हाका प्रतिवादी केला. ह्या प्रकरणाची फुडली सुनावणी 24 जुलय दिसा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
