भांगरभूंय | प्रतिनिधी
वेर्णें पुलिसांची कारवाय
मुरगांव: दुचाकीं चोरी प्रकरणांत वेर्णें पुलिसांनी दोगां गोंया भायल्या तरणाट्यांक अटक केली. आयज (बिरेस्तारा) तांकां न्यायालयांत उबे करतकूच 14 दीस न्यायालयीन कोठयेंत दवरपाचो आदेश न्यायालयान दिलो. वेर्णें पुलीस फुडलो तपास करतात.
वेर्णें पुलिसांनी दिल्ले म्हायती प्रमाण सोहेल फिरोज शेख (19), बलराम शंकर दास (22) अशीं तांचीं नांवां आसात. तातूंतलो सोहेल शेख हो मूळचो कर्नाटकाचो, जाल्यार बलराम दास हो मूळचो अस्तंत बांगालांतल्या कोलकात्याचो आसा. सद्या ते दोगूय वेर्णें वाठारांत रावताले.
तांणी वेगळ्यावेगळ्या सुवातां वेल्यान तीन दुचाकीं चोरिल्ल्यो. तातूंत दोन अॅक्सेस आनी एक अॅक्टिव्हाचो आस्पाव आसा. ह्यो तिनूय दुचाकीं झुआरीनगरांतल्यान जप्त केल्यात.
दुचाकीं धनयांनी वेर्णें पुलीस स्टेशनार दिल्ले कागाळी प्रमाण फाटल्या कांय दिसां सावन पुलीस ह्या चोरां फाटल्यान आशिल्ले. ते खातीर वेर्णें पुलिसांनी एक पंगड स्थापन केल्लो. पुलिसांनी पाळत दवरून आनी सांपळो रचून ह्या दुबावीत चोरांक धरिल्ल्याची म्हायती वेर्णें पुलिसांनी दिली.
तांचे कडेन आनीक दुचाकी चोरये विशीं पुलीस तपास करतात. काल दोगांकूय न्यायालयांत उबे करतकूच न्यायालयान तांकां 14 दीस न्यायालयीन कोठयेंत दवरपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
