भांगरभूंय | प्रतिनिधी
मडगांव, प्रतिनिधी ः मडगांवचे जेश्ठ आमदार दिगंबर कामत हांची प्रतिमा इबाडटली अशें पोस्टर लावन तांची बदनामी केल्ल्यान श्रीराम रायतूरकार आड मडगांव पुलिशेंत गुन्यांव नोंद जाला.
मेळिल्ले म्हायती प्रमाण, सिने लता थिएटरा लागसार रावपी सागर गस्ते हांणी मडगांव पुलीस स्टेशनांत कागाळ दाखल केल्या. दुबावीत श्रीराम रायतूरकार हांणे 6 मे दिसा सांजवेळा सुमार 7.30 वरांचेर खारेबांधांतल्या हॉटेल तंदूर लागसार रेल्वे उड्डाणपुल आनी फूट ब्रीजाचेर आमदार कामत हांचें चित्र आशिल्ले पोस्टर लायले. तशेंच आमदारांनी घोटाळे केल्यात अशेंय ताचेर आक्षेपार्ह बरयल्ले आशिल्लें. हाचे भायर दुबावितान सोशल मिडियाचेरुय पोस्टर व्हायरल केले असो उल्लेख गस्ते हांणी कागाळींत केला.
मडगांव पुलिसांनी हे कागाळीची चवकशी करून दुबावीत श्रीराम रायतूरकार आनी हेरां आड बदनामी आनी भौशीक सुवातींचो इबाड केल्ल्यान गुन्यांव नोंद केलो. पुलीस निरिक्षक तुळशीदास नायक हांच्या मार्गदर्शना खाला फुडली चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
