भांगरभूंय | प्रतिनिधी
शेळप बुद्रुक भरत सावंत मरण प्रकरण
पणजी: 2015 वर्सा सत्तरींतल्या शेळप बुद्रुक हांगा विजेचो शॉक दिवन नुस्तेमारी करतना भारत सावंत हाका मरण आयिल्लें. ह्या प्रकरणांत पणजेंतल्या उत्तर गोंय जिल्हो आनी सत्र न्यायालयान दुबावीत मयताचो भाव सचीन सावंत, गणेश सावंत आनी राजेंद्र सुरलकार ह्या तिगांची पुरावो नाशिल्ल्यान निर्दोश सुटका केली.
ह्या प्रकरणांत वाळपय पुलिसांनी 7 एप्रील 2016 दिसा गुन्यांव दाखल केल्लो. 28 जून 2015 दिसा भारत सावंत हाका मरण आयिल्लें. त्या वेळार ताका घरा कडेन फेर्र मारतना शॉक लागून मरण आयिल्ल्याची म्हायती पुलिसांक दिल्ली.
ते प्रमाण पुलिसांनी मुळावी चवकशी केली तेन्ना 28 जून 2015 दिसा मयत भरत सावंत ताचो भाव सचीन सावंत आनी राजेंद्र सुरलकार विजेचो शॉक दिवन नुस्तेमारी करपा खातीर गेल्ल्याची म्हायती मुखार आयली. जाल्यार दुबावीत गणेश सावंत हाका वयलो प्रकार खबर आसतना ताणें पुलिसांक तशेंच कुटुंबाक भारत सावंत घरा फेर्र मारतना शॉक लागून मरण आयिल्ल्याची म्हायती दिवन दिशाभूल केल्ल्या प्रकरणांत वाळपय पुलिसांनी ताचे आड भारतीय दंड संहितेच्या कलम 304 (सदोश मनीसवध) आनी 201 (पुरावे नश्ट करप) खाला गुन्यांव दाखल करून अटक केल्ली. उपरांत न्यायालयान दुबावितांची जामिनाचेर सुटका केल्ली. ह्या प्रकरणांत वाळपय पुलिसांनी दुबावितां आड न्यायालयांत 28 ऑक्टोबर 2016 दिसा आरोपपत्र दाखल केल्लें.
ह्या प्रकरणाची सुनावणी जाली तेन्ना ह्या प्रकरणांत पयले नदरेक साक्षिदार ना. तशेंच साक्षिदारान दिल्ले साक्षींत तफावत आशिल्ली. हाचे बगर जप्त केल्ल्या वीज वाहिनींत विद्युत प्रवाह पार करपाक सक्षम आशिल्ले हाचो पुरावो ना. तशेंच मयत दुबावितां सयत नुस्तेमारी करपा खातीर वा ताका दुबावितांनी उदकांत वचपाक प्रवृत्त केल्ल्याचें पुरावे नाशिल्ल्याचो युक्तिवाद दुबाविताचे वकील अनूप कुडतरकार हांणी न्यायालयांत मांडलो.
ह्या प्रकरणांत न्यायालयान वयलो युक्तिवाद आनी मुद्याची दखल घेवन पुरावो नाशिल्ल्यान दुबावितांची निर्दोश सुटका केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
