भांगरभूंय | प्रतिनिधी
मडगांव, प्रतिनिधीः केरळा सावन गोंयांत पुर्णा एक्सप्रेस रेल्वेंतल्यान प्रवास करपी तरणाटेच्या तोंडा मुखार हस्तमैथुन करपाची एक हळशिकावणी घडणूक घडली. हे विशींच्या कागाळी उपरांत विकृत दुबावीत दत्तात्रेय चव्हाण (रा. कन्नूर- केरळ, मूळ सांगली- महाराष्ट्र) हाका कोंकण रेल्वे पुलिसांनी अटक केली.
पिडेस्त तरणाटी पुर्णा एक्स्प्रेस हे रेल्वेन कोझिकोड, केरळ सावन आपल्या दोगां इश्टां सयत गोंयांत प्रवास करताली. ही रेल्वे गोकर्ण रेल्वेस्टेशनाच्या लागसार आयली तेन्ना दत्तात्रेय (४७ ) हाणें तरणाटी न्हिदिल्ले सुवातेर येवन तिच्या मुखार पँट उघडून तिच्या तोंडा लागीं हस्तमैथून करपाक सुरवात केली. हे घडणुके उपरांत पिडेस्त बायले सयत आशिल्ल्या तरणाट्यान कोकण रेल्वे पुलिसांचे आपत्कालीन सेवे कडेन संपर्क केलो आनी हे घडणुके विशीं म्हायती दिली. मडगांवच्या कोकण रेल्वे पुलिसांक तरणाटेच्या विनयभंगा विशीं म्हायती मेळ्ळी. कोकण रेल्वे पुलीस निरीक्षक सुनील गुडलर हांचे सयत सहाय्यक पुलीस निरीक्षक गोम्स, हेड कॉ. मिंगुल वाझ, पुलीस कॉ. कुलदीप गांवकार, महिला पोलीस कॉ. नीता कंवळेकार हांणी रोखडीच कारवाय करून विकृत दुबावीत दत्तात्रेय चव्हाणाक अटक केली.
दुबाविताक अटक केले उपरांत पिडेस्त बायलेन गोंय पुलिसांनी तोखणाय केली. गोंयच्या पुलिसांक लागून गोंयांत सुरक्षीत आसा अशें दिसता अशेंय तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
