भांगरभूंय | प्रतिनिधी
उदकाचो उणाव; उदका पुरवण खात्याची कागाळ करून लेगीत आडनदर
वाळपय: सत्तरी म्हालांतल्या ठाणें पंचायत वाठारांत डोंगुर्ली गांवांत फाटल्या तीन म्हयन्यां सावन पियेवपाच्या उदकाचो उणाव निर्माण जाला. नळाक उण्या प्रमाणांत उदक येता पूण ते खदूळ आसता. हाका लागून वाठारांतल्या लोकांचे भलायकीचेर परिणाम जावपाची भिरांत उक्तायल्या. खूबशे फावटी कागाळी करून लेगीत हाचे कडेन आडनदर केल्या. हे खातीर तिडकल्ल्या बायलांनी काल (बिरेस्तारा) वाळपय उदका पुरवण कचेरेंत वचून खर तिडक उक्तायली.
ह्या वेळार तांची अधिकाऱ्यां कडेन भेट जावंक शकली ना. पूण तांणी हे विशींचें निवेदन उदका पुरवण कचेरेंत सादर केलां. हाची ताकतिकेन दखल घेवची नाजाल्यार ताचे गंभीर परिणाम भोगचे पडटले अशी शिटकावणी तांणी दिल्या.
हे विशीं प्रतिक्रिया उक्तायतना मुनीला गांवकार हांणी सांगलें, फाटल्या तीन म्हयन्यां सावन वेवस्थीत उदक येना. हाका लागून बायलांक त्रास सोंसचो पडटा. हे विशींची कागाळ खूबशे फावटी केल्यो, पूण ताचे कडेन लक्ष दिल्लें ना. हाका लागून फुडारांत ही समस्या आनीक बिकट जावपाची शक्यताय आसा.
हे सुवातेर पंप ऑपरेटर म्हूण काम करपी कर्मचाऱ्यां कडेन हे विशींच्यो कागाळी दिल्यो, पूण ताचे कडेन अजून मेरेन लक्ष दिल्लें ना. हे खातीर बायलांनी खर निरशेणी उक्तायली. ठाणें पंचायती कडेन लेगीत कागाळी दिल्यो, पूण पंचायतीन लेगीत हाचे कडेन लक्ष दिलें ना अशी तिडकीची प्रतिक्रिया तांणी उक्तायली.
मजगतीं, हे विशीं वाळपय उदका पुरवण कचेरेचे सहाय्यक अभियंतो मदन देसाय हांचे कडेन संपर्क सादलो तेन्ना तांणी सांगलें, गांवांत निर्माण जाल्ल्या पियेवपाच्या उदकाचो उणाव दोन दिसां भितर सोडयतले. हाका लागून कसलेच तरेचो हुस्को करपाची गरज ना. सुरळीत उदका पुरवण करपा खातीर आडमेळीं निर्माण जायत आसात. त्यो सोडोवन लोकांक सुरळीत उदका पुरवण जावची हे खातीर यत्न करतले अशें तांणी मुखार उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
