भांगरभूंय | प्रतिनिधी
नाजाल्यार पर्यटक वतले शेजारच्या राज्यांनी
वास्को: गोंयच्या टॅक्सीकारांनी पोरणें विचार, पोरण्यो गजाली पयस दवरून ह्या सर्तीच्या युगांत कश्ट करपाची गरज आसा. हांव एक दोन भाडीं मारून घरा वतलों ह्या विचारांत रावल्यार तुमी खूब कितें व्हगडावन बसतले. तांणी शिस्त पाळूंक जाय. ह्या गजाली कडेन आडनदर केली जाल्यार पर्यटक शेजारच्या दर्यावेळा कडेन वळूंक लागले जाल्यार कितें जातलें हाचो विचार करात अशें आवाहन येरादारी मंत्री मॉवीन गुदिन्हो हांणी काल (सोमारा) केलें.
क्रुझ टर्मिनला भायर कांय टॅक्सीकारांनी जो प्रकार केलो तो लजेक घालपी आशिल्लो. फुडारांत अशे प्रकार घडचे न्हय. शांतीप्रिय गोंयकारांची शांतताय भंग करूं नाकात अशें तांणी सांगलें.
गोंय मुक्ती दिसा निमतान चिखले पंचायत मैदानार आयोजीत केल्ले कार्यावळींत मंत्री गुदिन्हो उलयताले. हे कार्यावळीक उपजिल्होधिकारी रवीशेखर निपाणीकर, पुलीस उपअधिक्षक सलीम शेख, निरिक्षक कपील नायक, येरादारी पुलीस निरिक्षक शैलेश नार्वेंकार, उजो पालोवपी दळाचे आग्नेलो मेंडीस, पंचायत उपसंचालक प्रसिध्द नायक, येरादारी खात्याचे संचालक राजन सातार्डेंकार, अभियंते नोलास्को परेरा, बोगमाळोचे सरपंच संकल्प महाले, उपसरपंच लोरिना कुन्हा, चिखलीच्यो उपसरपंच ऐश्वर्या कोरगांवकार, तशेंच हेर मानेस्त हाजीर आशिल्ले.
तांणी आपल्या भाशणांत टिकाकारांक लक्ष्य केलें. थोडे लोक कारण नासतना टिका करतात. टिका करचीच, तेच बरोबर बऱ्या कामाची लेगीत तोखणाय करची अशें तांणी म्हणलें.
दाबोळी विमानतळ बंद जावचो ना अशें सेगीत सांगून लेगीत ते संबंदीची चर्चा बंद जायना. मोपा आनी दाबोळी विमानतळांक लागून हांगा लॉजिस्टीक हबाक चालना मेळपाची शक्यताय आसा. ताका लागून जे कामां खातीर देशा भायर गेल्यात ते परतून गोंयांत येतले अशी आस्त तांणी उक्तायली. बऱ्या प्रकल्पांक कांय जाण सदांच हरकत घेतात. लोकांक वायट ते सांगतात. पूण त्या प्रकल्पांतल्यो बऱ्यो गजाली सांगिनात. कांय जाण सेगीत नकारात्मक गजाली पातळायतात अशें तांणी म्हणलें. नकरात्मक गजाली पातळावपी लोकांक पयस करात जाल्यारूच गोंयांत बरो विकास जावंक शकतलो अशें तांणी म्हणलें. तांणी आपल्या उलोवपांत जुवारी नवो पूल, मोपा विमानतळ, आयआयटी प्रकल्प तशेंच हेर गजालींक हात घालो.
ह्या वेळार विद्यालयांतल्या विद्यार्थ्यांनी संचालन तशेंच सांस्कृतीक कार्यावळी सादर केल्यो. ह्या वेळार नौदळाचें बँडूय वांटेकार जाल्लें. वास्को पुलिसांनी गुदिन्हो हांकां मानवंदना दिली. ह्या वेळार व्हिंटेज कार रॅलीचें आयोजन केल्लें. हे रॅलींत वांटेकार जाल्ल्यो पोरण्यो मोटारी पळोवन हाजीर आशिल्ले लोक भारावन गेले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
