भांगरभूंय | प्रतिनिधी
शेतकी मंत्री रवी नायक हांचें विधानसभेंत सांगणें
गोंया भायल्यान टमाट हाडून विकतात 103 रुपयांनी
पणजी: फलोत्पादन म्हामंडळा वतीन भायल्या राज्यांतल्यान टमाट हाडून गोंयच्या लोकांक ते 103 रुपया कील हे प्रमाण विकतात. ताका लागून देशांत टमाटांचें मोल वाडिल्लें आसलें तरी गोंयकारांक ताचो त्रास जाल्लो ना अशें शेतकी मंत्री रवी नायक हांणी मंगळारा विधानसभेंत सांगलें.
आमदार विजय सरदेसाय हांणी शुन्य वराक टमाट आनी मिरसांग हांचे मोल वाडिल्ले विशीं प्रस्न विचारिल्लो. सद्या गोंयांत टमाट 140 रुपया, जाल्यार मिरसांग 60 रुपया कील प्रमाण विकतात.
शेतकी तज्ञांच्या मतान फुडारांत टमाट 300 रुपया कील जावपाची शक्यताय आसा. मदेकाच्या काळांत आयिल्लें गरमेचें ल्हार आनी उपरांत टमाटांची मुखेल निर्यात आशिल्ल्या कर्नाटक, आंध्र प्रदेश ह्या राज्यांनी उटंगाराचो पावस पडिल्ल्यान टमाटांच्या पिकाचें व्हड प्रमाणांत लुकसाण जालें. फुडारांत गोंयाक अल निनो चक्रिवादळाचो घात जावंक शकता. ताका लागून मोल आनीक वाडूंक शकतात. ताका लागून शेतकी खात्यान भायल्यान टमाट हाडून दरेक गोंयकाराक दोन कील फुकट दिवचे अशी मागणीय सरदेसाय हांणी केली.
ताचेर उलयतना टमाटाचें मोल वाडिल्ल्याचो त्रास गोंयकारांक ना, मागीर विजय सरदेसाय हांकां कित्याक जाता अशें म्हणून मंत्री रवी नायक हांणी तांकां थोमणो मारपाचो यत्न केलो.
मजगतीं, टमाटाचें मोल दिसानदीस वाडत आशिल्ल्यान सर्वसामान्य गोंयकारांचे अर्थीक बजेट हाल्लां. सद्या उक्त्या बाजारांत 140 ते 160 रुपया कील ह्या मोलान टमाट विकतात. बेळगांव मार्केटांतूय टमाटाचो उणाव आशिल्ल्यान चिकमंगळुरू सावन उक्त्या बाजारांतल्यान टमाट हाडटात. ताका लागून तो आनीक म्हारग जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
