जुवारी न्हंयेचे देगे वयली संतोषी माता

भांगरभूंय | प्रतिनिधी

केपें तालुक्यांतलो कुडचडे मतदारसंघ खूब ल्हान, पूण सैमाचे गिरेस्तकायेन भरिल्लो वाठार. सांगे, केपें, धारबांदोडा तालुक्याच्या लोकांचें कुडचडकारां कडेन आपुलकायेचें नातें. देवळा, कपेलां, मशिदी ,दर्गा, शेतां, दोंगर, झरे माणकुल्या कुडचड्याची सोबीतकाय वाडयता. समाधान, आनंद दिता. ह्या वाठारांतले हिंदू, मुस्लीम, क्रिस्तांव लोक एकवटान  सण, उत्सव मनयतात. विंगड विंगड कलाकारांनी भरिल्ल्या कुडचडे वाठारांत संस्कृतायेची धन दौलत मेळ्ळ्या. सैमदेणें पसरलां. ह्या सैमाचे वेंगेत जुवारी न्हंयेचे देगेर बशिल्ली जागृत  देवता श्रीसंतोषी माता.  तिची सासाय कुडचडे तशेंच शेजारच्या वाठारांनी पातळ्ळ्या. मातेचें देवूळ   कुडचड्यार कशें उबें जालें,  हाची आख्यायिका अशी…

एक दीस 1996 वर्सा तनुजा प्रभाकर वस्त हिचेर भार आयलो. त्या संचाराचेर मातेन सांगलें कुडचडेच्या सुर्ल ह्या पवित्र आनी शांत जाग्यार आपूणच बसतली. थंय आपली मठी बांदात. 27 दिसां भितर उबी जावंक जाय. ती कशी करुन घेवपाची ती आपूण करुन घेतली. 27 दिसांनी देवूळ बांदप भोव कठीण. ती जमीन तर रेब्याची, चिखलाची,  रस्त्या परस खोलायेची… आनी २७ दिसां भितर देवूळ कशें उबें जातलें हो प्रश्न निर्माण जालो. तेदवेळार मातेन संचाराचेर सांगलें,  तुमी भियेवनाकात. तुमचे भितर  बळगें आनी आत्मविश्वास आपूण दितां. तुमी फक्त मुखार सरात. मातेन सांगिल्ले प्रमाण प्रभाकर वस्त  आनी तांचे वांगडी त्या जाग्यार गेले, जाग्याची पळोवणी केली. तो जागो पळयल्यार देवूळ उबें जातलें कांय ना अशें तांकां  दिसपाक लागलें. पूण अजाप अशें…….. मातेच्या सासायेन, तिच्या  आशिर्वादान  आनी भक्तगणांच्या नेटाचेर 27 दिसां भितर देवूळ उबें जालें. हीच तर व्हड आख्यायिका.      कृष्ण पक्ष पंचमी 1996 वर्सा देवूळ उबें जावन तातूंत अष्टवंदन करुन फोटो पुजन केलें.  मातेच्या आशिर्वादान भक्तांची कामां जावंक लागलीं. मातेचो नवस केल्यार मनात आशिल्लीं कामां पुराय जातात, असो लोकांचो भावार्थ, श्रद्धा. 

16 शुक्रार संतोषी मातेचो नवस जातकीर मातेच्या देवळांत उध्यापन करतात. तिचो प्रसाद चण्याचो.  तन- मनान  भक्त मातेक शरण येतात. भलायकी, शिशण,  उद्देग , नोकरी, लग्न  हे खातीर भक्त मातेच्या चरणा कडेन नतमस्तक जावन मागणें करतात आनी दर एका  भक्तांची मागणी माता आयकता आनी प्रसन्न जाता.  आयज हजारानी भक्तगण मातेचें दर्शन घेतात. पर्यटक मोट्या संख्येन देवळांत येतात आनी सरभोंवतणच्या वाठाराचो आनंद घेतात. मातेचो वर्सुकी उत्सव असो – श्रावण शुक्रार, नवराञ,  मखरोत्सव, दसरो, गुलालोत्सव, संवसार पाडव्याक दीपोत्सव. जे भक्तगण मातेचे व्रत करतात तांचे 16 उध्यापन अशें कार्यक्रम मनयतात.  

सुरवातेक बारीक अशें उबें केल्ले मातेचें  नवे देवून बांदपाक वीस वर्सा लागलीं. आयज त्या जाग्यार मातेच्या सासायेन आनी भक्तांच्या सहकार्यान  भव्य देवूळ  उबें जालां.   देवळांत मातेच्या कुशीक महाकाली,  महागणपती, सरभोंवतणी पंचकन्या. गर्भकुड  शटकोनी अशी देवळा भितरली मांडावळ.  

 – संदीप पुंडलिक मापारी

96731 71992