भांगरभूंय | प्रतिनिधी
काणकोणां परतून इमारत कोसळपाची शक्यताय: धिरज नायक गांवकार
काणकोण: जी सुडाच्या येवजणे खाला काणकोण नगरपालिका 11 कोटी रुपया खर्च करून भोवउद्देशी इमारत प्रकल्प उबारता. पूण ह्या इमारत प्रकल्पाचें बांदकाम सुरवाती सावनूच निकृश्ट दर्जाचें जायत आसा. हें बांदकाम जी सुडा वतीन सुरू आशिल्ल्यान बांदकामाचेर देखरेख दवरपा खातीर जी सुडाचो जापसालदार मनीस हाजीर रावना. ते खातीर निकृश्ट दर्जाच्या कामाक लागून परतून इमारत कोसळून दुर्घटणा घडपाची शक्यताय न्हयकारूं येना. ताका लागून संबंदीत यंत्रणेन बांदकामाचेर लक्ष दिवचें अशी मागणी काणकोणां घेतिल्ले पत्रकार परिशदेंत नगरसेवक धिरज नायक गांवकार हांणी केली.
ह्या इमारतीचें बांदकाम करतना खडयेचो पावडर वापरतात. एक खांब एक वटेन लवंडला. जाल्यार बुन्याद घटमूट ना. हें बांदकाम निकृश्ट दर्जाचें आशिल्ल्याचें हालींच केल्ले पळोवणेंत दिसून आयलें. काणकोणचे आमदार आनी सभापती रमेश तवडकार हांणी लेगीत हें काम पळयलां. जी सुडान गंभीरतायेन ह्या बांदकामाची पळोवणी करची आनी निकृश्ट दर्जाचें काम मोडून नव्यान बांदकाम सुरू करचें, नाजाल्यार काणकोणकारांक आंदोलन करचें पडटलें अशी शिटकावणी काँग्रेस पक्षाचे सरचिटणीस जनार्दन भंडारी हांणी दिली.
व्हिजन आनी मिशन ह्या बॅनरा खाला ही पत्रकार परिशद आपयिल्ली. ह्या वेळार काणकोणचे आदले नगराध्यक्ष श्यामसुंदर देसाय, गोवा फॉरवर्ड पक्षाचे म्हणयारे विकास भगत, वैष्णव पेडणेंकार, आदले सरपंच महादेव गांवकार, मनेश नायक गांवकार, शंकर नायक हाजीर आशिल्ले.
धुमाण्यां कोयरा प्रकल्पाचेंय काम अर्दकुटें आनी निकृश्ट दर्जाचें आसून पालिकेन कंत्राटदाराक उरिल्ली रक्कम दिवची न्हय. कोयरा प्रकल्पाचें काम पुराय करून घेवचें आनी कोयराचें वेवस्थीत वेवस्थापन करचें अशीय मागणी धीरज नायक गांवकार हांणी केली.
कुंकळ्ळी ते काणकोण रस्त्याचें हॉटमिक्स डांबरीकरण जावचें, काणकोणां लांब पल्ल्याच्यो रेल्वे थांबच्यो, वीज, उदक ह्यो समस्या सुटोव्यो करपा खातीर संबंदितांक निवेदनां भेटयिल्ली आनी 30 नोव्हेंबर मेरेन मुजत दिल्ली. तीं कामां पुराय जावंक नाशिल्ल्यान आतां 5 डिसेंबरा उपरांत केन्नाय संबंदितांक जाप विचारतले अशें जनार्दन भंडारी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
