भांगरभूंय | प्रतिनिधी
फोंडें येरादारी पुलिसांची दंडात्मक कारवाय
फोंडें: गोंयांत येरादारी पुलीस येरादारी नेमाची खर अंमलबजावणी करीत आसले तरी हॅल्मेट घालूंक नाशिल्ले आनी हेर गुन्यांव वाडत आशिल्ल्याचें दिसून येता. फोंडें आनी धारबांदोडें म्हालांत येरादारी पुलिसांनी जानेवारी ते नोव्हेंबर मेरेन वट्ट 41,068 वाहन चालकां आड दंडात्मक कारवाय करून 16,15,160 रुपयांचो महसूल सरकारी तिजोरेंत जमा केला. डिसेंबर म्हयन्यांत हातूंत आनीक भर पडपाची आसून येरादारी पुलिसां कडेन एकूच अल्कोमिटर आशिल्ल्यान सरकारान हे संबंदी गंभीरतायेन विचार करून येरादारी पुलिसांक गरजेच्यो सुविधा उपलब्ध करून दिवपाची गरज आसा.
फोंडें येरादारी पुलिसांनी निरिक्षक कृष्णा सिनारी हांच्या मार्गदर्शना खाला जानेवारी ते नोव्हेंबर म्हयन्या मेरेन विवीध सुवातींनी येरादारी नेमांक पाळो दिनाशिल्ल्यां आड खर दंडात्मक कारवाय केली. हातूंत सगल्यांत चड 6610 वाहन चालकांक आड घातक पार्किंगे खातीर दंडात्मक कारवाय केल्या. हॅल्मेट घालूंक नाशिल्ले 5926, सीट बेल्ट घालूंक नाशिल्ले 3520, फिल्मींग ग्लास 4603, गतीन वाहन चलोवप 1797, घातक स्थितींत वाहन चलोवप 155, सोऱ्याचे घुंवळेंत वाहन चलोवप 142, तशेंच हेर येरादारी नेमांचो भंग केल्ल्या प्रकरणांत येरादारी पुलिसांनी दंडात्मक कारवाय केल्या.
फोंडें येरादारी पुलिसांनी सुमार 2057 वाहन चालकाचे परवाने निलंबीत करपा खातीर संबंदीत खात्या कडेन फाटपुरवण केल्या. ते खातीर वाहन चालकांचे परवाने निलंबीत जावपाचे प्रकार फोंडें वाठारांत वाडत आशिल्ल्याचें दिसून येता. तशेंच येरादारी पुलिसां कडल्यान विद्यार्थ्यांक तशेंच हेर लोकांक येरादारी नेमा संबंदी जागृताय करतात. येरादारी पुलिसां कडेन एकूच अल्कोमिटर आशिल्ल्यान कारवाय करतना पुलिसांची धांवपळ जाता. हे खातीर सरकारान येरादारी पुलिसांक गरजेचे अल्कोमिटर उपलब्ध करून दिवपाची गरज आसा.
फोंडें आनी धारबांदोडें म्हालांत येरादारीचेर खर नदर दवरतात. नेमाचो भंग करपी वाहन चालकां आड दंडात्मक कारवाय करपा बरोबर येरादारी नेमाची जाणीव करून दितात. तशेंच विवीध हायस्कुलांतल्या विद्यार्थ्यांक येरादारी नेमा संबंदी म्हायती दिवपाक येरादारी पुलीस म्हत्वाचें काम करीत आशिल्ल्याचें येरादारी पुलीस निरिक्षक कृष्णा सिनारी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
